Абай облысы Көкпекті ауданы Көкпекті ауылдық округінде 15 қыркүйек күні округ әкімінің сайлауы өтіп, халық өз таңдауын жасады. Бұл округ бойынша сайлауға түскен кандидат саны 4-еу.

Оның бірі – Көкпекті ауылының тұрғыны, уақытша жұмыссыз жүрген 47 жастағы Данияр Адиевич Айдаров. Екіншісі Көкпекті ауданының қаржы бөлімі мемлекеттік мекемесінің басшысы 33 жастағы Азылхан Серикканұлы Куспеков. Үшінші кандидат – уақытша жұмыссыз, 42 жастағы Бек Назарбекұлы Нугыбаев. Төртіншісі Көкжайық ауылдық округі әкімі аппаратының бас маманы Абай Аханұлы Нұрлыбаев. Аудандық аумақтық сайлау комиссиясының төрағасы Ерасыл Оразхановтың айтуынша, барлық кандидат өзін-өзі ұсынған. 

Әкім сайлау – қазаққа бейтаныс рәсім емес. Бабаларымыз болыс, би, қазыларды да, ханды да сайлаған. Ұлы далада қалыптасқан сайлауы да, заңы да, басқару жүйесі де болған. Сол үдеріс бүгінде жаңғырып жатса, неге құптамасқа?! Міне, Президенттің «Халық үніне құлақ асатын мемлекет» тұжырымдамасы аясында жүзеге асырылып жатқан ауыл әкімдерінің сайлауы 15 қыркүйек күні Көкпекті ауылдық округінде ұйымшылдықпен өткізілді. 

Көкпекті ауданының аумақтық сайлау комиссиясы «Қазақстан Республикасындағы сайлау туралы» Қазақстан Республикасы Конституциялық Заңының 14-бабының 9) тармақшасына, 44-бабының 2-тармағына, 45-бабына, 113-10-бабына сәйкес, Көкпекті ауданы, Көкпекті ауылдық округі әкімінің сайлау нәтижесі туралы учаскелік сайлау комиссияларының хаттамалары негізінде сайлау қорытындысын жариялады. 

Сонымен Көкпекті ауылдық округінде өткен сайлауға сайлау округі бойынша сайлаушылар тізіміне енген 3748 азаматтың 1294-і қатысып, дауыс берді.

- Көкпекті ауылдық округі әкімінің сайлауы әділ өтті. Халықтың белсенділігі де жоғары болды. Сайлауға түскен 4 кандидаттың осалы жоқ. Олар өзін-өзі ұсынғандықтан да халық өзіне жайлысын, ауыл үшін қабырғасы қайысып жұмыс істейтін үміткерді таңдауға тырысты. Жалпы сайлау тартысты өтті. Сөйтіп сайлау барысында Айдаров Данияр Адиевич сайлаушылардың 485, Куспеков Азылхан Серикканович – 56, Нурлыбаев Абай Аханович – 52, Нугыбаев Бек Назарбекұлы – 623 дауысына ие болды.  Сайлау қорытындысымен Көкпекті ауылдық округінің әкімі болып Нугыбаев Бек Назарбекұлы сайланды. 1982 жылы туған, өзін-өзі ұсынған ол Көкпекті ауданы Көкпекті ауылында тұрады. Көкпекті аудандық сайлау комиссиясының шешімімен Бек Назарбекұлына әкім куәлік табысталды, - дейді аудандық аумақтық сайлау комиссиясының төрағасы Ерасыл Оразханов.