Еліміздің ауылдық округтерінде әкімдер сайлауы 2021 жылдан бері өтіп келеді. Жақында, нақты айтар болсақ, осы жылдың  10 қарашасында Түркістан облысының Сауран ауданының Үшқайық ауыл округінде әкім сайлауы өтті. 

Ауданық аумақтық сайлау комиссиясының төрағасы Мейрхан Казихановтың айтуынша, ол ауылдық округ бойынша кандидат ретінде 5 үміткер тіркелген. Олардың барлығы да өзін-өзі ұсынғандар. 

Сонымен округ әкімі лауазымына кандидат болып кімдер тірлкелді? Тіркелген кандидаттың бірі – уақытша жұмыссыз жүрген 35 жастағы Санжар Сейсенбекұлы Жусупов. Екінші кандидаттың есімі – Бағлан Сейлханұлы Баймаханов. 35 жастағы ол Жібек жолы ауылдық округ әкімі аппаратының бас маманы. Үшінші кандидат – 43 жастағы Шонақ ауылдық округі әкімі аппаратының бас маманы Серік Байдуллаұлы Аяганов. Төртінші кандидаттың есімі – Сейітжан Шакирұлы Зулпыхаров. 48 жастағы ол Шонақ ауылдық округі әкімі аппаратының бас маман-есепшісі. Соңғы кандидат – 31 жастағы аудандық Мәдениет, тілдерді дамыту, денешынықтыру және спорт бөлімінің Шонақ ауылдық «Мәдениет үйі» коммуналдық мемлекеттік мекемесінің директоры Болат Сенбекұлы Сенбеков.  

- Ауылдық округ әкімдерін сайлау – жалпы өзін-өзі басқару жүйесінің маңызды бөлігінің бірі. Сондықтан, ауылдық округ әкімін сайлаудың нәтижесі аса маңызды. Бұл бір жағынан сайланған әкімнің жауапкершілігіне байланысты. Сондай-ақ, қарапайым халықпен қарым-қатынастағы «Халық үніне құлақ асатын мемлекет» тұжырымдамасының шын мәнінде жүзеге асуына өз үлесін қосады. Ауылдық округ әкімі «Ауыл аманаты» жобасын орындау, ағын су мәселесін шешу, су үнемдеу технологиясын тиімді пайдалану мен ауыл шаруашылығы техникаларын жаңарту, мемлекеттік бағдарламаларды орындау ісіне айрықша көңіл бөлуге тиіс. Сонымен қатар, жұмыспен қамтуды үйлестіру, шағын және орта бизнесті қолдау, кәсіпкерлік субъектілерін қаржылай қолдау және жаңа бизнес идеяларды іске асыру, ауылдың мүмкіндігін ескере отырып туризмді дамыту мәселесіне назар аударуға міндетті. Міне, осы міндеттерді өз мойнына алып жұмыс істеуге, өзін ұйымдастырушылық және іскерлік қырынан көрсетуге талпынған үміткерлер кеше өткен сайлауда таңдалды. Мәселен, Үшқайық ауылдық округ бойынша сайлаушылар тізіміне енгізілген 2616 азаматтың 1228-і дауыс берді. Сайлау қорытындысымен сайлаушылардың басым дауысын жинаған Сенбеков Болат Сенбекұлы округ әкімі болып сайланды, - дейді ауданық аумақтық сайлау комиссиясының төрағасы Мейрхан Казиханов.

Бір атап өтерлігі, мұнда бастапқыда тіркелген 5 кандидаттың сайлау қарсаңында екеуі өз еріктерімен кандидаттықтан бас тартты. Ал Үшқайық ауылдық округі әкімінің сайлауы бойынша бюллетеньге енген үш кандидат сайлауға қатысты. Дауыс санау қорытындысында Зулпыхаров Сейтжан Шакирович сайлаушылардың 503, Аяганов Серик Байдуллаевич 14, ал Сенбеков Болат Сенбекұлы 711 дауысына ие болған еді. Сонымен сайлау қорытындысы бойынша Үшқайық ауылдық округінің әкімі болып 1993 жылы туылған, Сауран ауданы Мәдениет үйінің директоры Сенбеков Болат Сенбекұлы сайланды. Бүгінде ол өз қызметіне кірісіп, жұмыс бағытын округтің әлеуметтік-экономикалық бағытын көтеруге бағыттап отыр.