Шымкентте  өз кәсібін дөңгелетуге ниеттілер көп-ақ. Мұндай жандарға мемлекеттік бағдарламалар сүйеу болуда. Мәселен шағын және орта бизнес бастау үшін 6 пайыздық субсидия, жеңілдетілген несие алуға «Даму» кәсіпкерлікті қолдау қоры көмектесіп келеді. Аталған қордан қолдау алған қала тұрғыны Әлия Әмірбекова «Vanil» кондитерлік цехын ашып, отбасымен бірге дамытып келеді. Қай күні барсаң да дүкендері тәтті сатып алуға келген тұтынушыларға толы.

 «Vanil» кондитерлік үйі - 2012 жылы құрылған отбасылық кондитерлік мекеме. Әлия Әмірбекова - Шымкент қаласында кондитерлік дүкен ашу жөнінде идея көтеріп, оны жүзеге асырған азаматшаның бірі. Бүгінде мегаполистің аспаз бен кондитерлер гильдиясының мүшесі болып табылады. Әлия – сүйікті ісін дамыту үшін Испания, Франция, Ресей және Украинаның үздік кондитерлік мектептерінде білім алған.  

«Азық-түлік өнеркәсібінде бизнес бастау оңай болмады. Бастапқы капитал, жұмыс күші, өткізетін жер, сәйкестік сертификаты, рұқсат қағаздары керек еді. Біз қиындықтарды жеңдік, тәжірибе жинадық.«Даму» Қорының көмегімен өз ғимаратымызды сатып алдық. Қазір күнделікті жеуге арналған жеңіл тоқбасарлармен қатар, кез келген күрделі авторлық дизайны өнімдерді шығаратын өз кондитерлік үйіміз бар», - дейді Әлия Әмірбекова. 

«Vanil» кондитерлік үйі өз клиенттеріне кез-келген мерекеге орай, өзінің тәттілерімен және десерттерімен әсемдеуге дайын.

Шағын ғана кәсіп ашу үшін «Даму» Қорынан қандай қолдау ала аласыз? Егер сіз микро-, шағын кәсіпкерлік субъекті санатына жатсаңыз және бизнес-жобаңызды жүзеге асыруға 20 млн теңгеге дейін қаржы қажет болса, «Бизнестің жол картасы – 2025» мемлекеттік бағдарламасы (1-бағыты) аясында қолдау ала аласыз. Бағдарламаның бірінші бағыты бойынша жылына 6%-бен (субсидия есебінен) несие алып, банк талап еткен кепіл затыңыз жетпеген кезде «Даму» Қорының кепілдігін пайдаланыңыз. Бағдарламаның артықшылықтары көп. Мысалы: бизнестің саласына шектеу жоқ, қор өтінімді қысқа уақытта қарастырады, ЕДБ/МҚҰ және Қорға аз құжат өткізесіз.