Егемен ел болғанымызға 30 жылдан асып отыр. Тәуелсіздік – біздің ең қастерлі құндылығымыз. Осыған орай Еңбекші ауданында бірқатар нысан ашылу жоспарлануда. Соның бірі және бірегейі "Оңтүстік" арнайы экономикалық аймақта «Шымкент химиялық ком­паниясы» жанармай өңдеуге қажетті химиялық қоспа (Метил-трет бутил эфир – МТБЭ) және пластикалық материалға қажетті (полипропилен) ұнтақтарды шы­ғару зауыты болмақ.

Жаңа кәсіпорынның өндірістік қуаты жылына 57 мың тонна МТБЭ құрайды. Бұл оған ішкі нарық­тың қажеттіліктерін толығымен жабу­ға мүмкіндік береді. «ШХК» ЖШС зауытын ресми іске қосу қазақстандық мұнай-химия сала­сының сапалы жаңа деңгейге көшуінің бастамасы болмақ. Өйт­кені кәсіпорын жаңғыртылған Шымкент мұнай өңдеу зауытында (ШМӨЗ) мұнай-газ химиясы шикізатын өңдеу тереңдігін елеулі дәрежеде арттыруға мүмкіндік береді. Енді, өңірде этилденбе­ген автомобиль бензиндерін алу кезінде пайдаланылатын құра­мында оттегі бар негізгі жоғары октанды компоненттердің бірі – МТБЭ өз өндірісі жолға қойыл­ғандықтан, мұнда еуро-4 және еуро-5 экологиялық класты отын өндірілетін болады.

«ШХК» ЖШС бас директоры Манат Бибасовтың айтуынша, бүгінгі таңда жаңа зауыт өнім­дерінің басты тұтынушысы – ШМӨЗ. Қазір барлық өндірістік процестер жолға қойылды, мұ­най-химия өндірісіне лицензия алын­ды. Кәсіпорын мұнай-хи­мия саласының өнеркәсіптік тұтыну­шыларының тізбесіне енгізілген.

Зауыт құрылысы, жабдықтар­ды сатып алу Қазақстан даму бан­кінің қарыз қаражаты есебінен жүзеге асырылды, ол Қазақстан Республикасын индустриялық-инновациялық дамытудың мемле­кеттік бағдарламасы аясында 10 жылға дейінгі мерзімге 9 миллиард теңге мөлшерінде қаржылық қол­дау көрсетті. Жобаның жалпы құны 13,7 миллиард теңгені құрады, осылайша қалған бөлігін 4,7 миллиард теңге көлемінде «ШХК» ЖШС өз қаражаты есебінен салып отыр.

Айта кетейік, Президент «Жа­ңа жағдайдағы Қазақстан: іс-қи­мыл кезеңі» атты Жолдауында аза­маттардың әл-ауқатын жақсартып, қолайлы орта қалыптастыруды тапсырған болатын. Бұл бағытта Шымкент қаласының 5 жылдық даму жоспары бекітіліп, негізгі басымдықтары айқындалды. Бірін­ші басымдық – кәсіпкерлік және өнеркәсіпті қолдау. Үшінші мегаполис Президенттің Жолдауына қолдау ретінде көптеген жобаларды жүзеге асыруды көздеп отыр.