Қазақстан Президенті Әкімшілігі басшысының бірінші орынбасары Тимур Сүлейменов Украинадағы санкциялар мен жағдай туралы айтты. Көпшілік Тимур Сүлейменовтың батыл пікірлерін оң бағалап, оны қаһарманға теңеп жатыр. Ал Ресей елі бұған шәт-шәлекей болып ашулануда. Біз Сүлейменовтың Euractiv порталына берген сұхбатынан үзінділерді жариялаймыз:

1) Қазақстан Ресейдің АҚШ пен ЕО салған санкцияларынан айналып өтетін құралы болмайды. Біз санкцияларды сақтаймыз. Біз Ресеймен, Беларусьпен және басқа елдермен экономикалық одаққа кірсек те, халықаралық қауымдастықтың бір бөлігіміз.

2) Иә, біз Ресеймен сауда-саттықты жалғастырамыз. Біз Ресейге инвестиция салуды және Ресейге инвестиция тартуды жалғастырамыз: біздің экономика басқаша істей алмайды. Бірақ біз санкцияланған тауарларды бақылауға бар күшімізді саламыз.

3) Ресейде "соғыс" сөзіне тыйым салатын заң шығару туралы шешім қабылданды. Олар мұны арнайы әскери операция деп атайды. Бірақ Қазақстанда біз оны қалай бар, солай атаймыз, өкінішке орай.

4) Әрине, Ресей бізді өз жағында болғанымызды қалады. Бірақ Қазақстан Украинаның аумақтық тұтастығын құрметтейді. Біз Қырымдағы жағдайды да, Донбасстағы жағдайды да мойындамадық және мойындамаймыз, өйткені БҰҰ оларды мойындамайды.