АҚШ, Израиль және Иран арасындағы шиеленістің күшеюі әлемдік мұнай нарығына бірден әсер етті. Сарапшылардың бағалауынша, геосаяси қауіптердің артуы салдарынан мұнай бағасы соңғы жылдардағы ең жоғары деңгейге жақындап отыр, деп жазады Оinet.kz.

Reuters агенттігінің мәліметінше, әлемдік мұнай бағасы шамамен 20%-ға өсіп, 2022 жылдың шілдесінен бергі ең жоғары көрсеткішке жетті. Нарықтағы басты алаңдаушылық – жеткізілімдердің қысқаруы және Таяу Шығыстағы негізгі тасымал жолдарының қауіпке ұшырауы.

Әсіресе, стратегиялық маңызы зор Ормуз бұғазы төңірегіндегі жағдай инвесторларды алаңдатып отыр. Бұл бұғаз арқылы әлемдік мұнай жеткізілімінің шамамен бестен бір бөлігі өтеді. Сондықтан кез келген қауіп немесе тасымалдың бұзылуы мұнай нарығына тікелей әсер етеді.

Дүйсенбі күнгі сауда барысында Brent маркалы мұнай фьючерстері шамамен 20%-ға қымбаттап, барреліне 111 доллардан асты. Ал West Texas Intermediate мұнайының бағасы 106–111 доллар аралығына дейін көтерілді.

Өткен аптада Brent бағасы 27%-ға, ал WTI 35%-дан астамға өскен. Сарапшылар Таяу Шығыстағы шиеленіс жалғаса берсе, әлем бойынша жанармай бағасы тағы да қымбаттауы мүмкін екенін ескертеді.

Сонымен қатар мұнайдың ірі экспорттаушысы Сауд Арабиясы жеткізілімдерді Қызыл теңіз арқылы арттыруға әрекет жасап жатыр. Дегенмен сарапшылар бұл бағыттағы көлемдер Ормуз бұғазы арқылы тасымалдың қысқаруын толық өтей алмайтынын айтады.