Бүгін Үкіметтің кеңейтілген отырысында Мемлекет басшысы алдында есеп берген Астана қаласының әкімі Жеңіс Қасымбек 2035 жылға қарай қала халқының саны 2,5 миллионға жетуі мүмкін екенін мәлімдеді, - деп хабарлайды Massaget.kz тілшісі.

"Астана – халық санының ең жоғары өсім қарқыны бар өңір (6,8%). 2024 жылы елорда тұрғындарының саны 90 мың адамға немесе 7 пайызға өсті. Халық саны: 1 520 756. Сіздің тапсырмаңызға сәйкес, Үкімет Астана қаласының жаңа Бас жоспарын бекітті. 2035 жылға қарай қала халқының саны 2,5 миллион адамға дейін артады деп болжанып отыр", - деді Жеңіс Қасымбек. 

Әкімнің сөзінше, қала тұрғындарына қолайлы мегаполис қалыптастыру мақсатында Бас жоспарға сәйкес алдағы 10 жыл ішінде 120-дан астам мектеп, 170-тен астам балабақша және 50-ден көп денсаулық сақтау нысанының құрылысы жоспарланып отыр. 

Айта кетейік, баяндама барысында әкім LTR құрылысы биыл жазда аяқталып, күзде іске қосылады деді.