Аурухана төсегіне таңылып жатқан жас ирандықтың аты Элахе Тавакалян. Оның оң көзіне операциядан кейінгі таңғыш қойылған. Сол көзі жабық, беті ауырсынғаннан қисайып кеткен, деп хабарлайды Oinet.kz тілшісі BBC-ге сілтеме жасап.

Элахеның қыркүйек айында Иранның солтүстік-шығысындағы Машхад қаласындағы наразылықтар кезінде оң көзі соқыр болып қалды, онда ол қауіпсіздік күштері отының астына түсіп қалған болатын.

Бірақ үш айдан кейін ғана Instagram-да  басынан не өткергені туралы бейнені жариялауға батылдық танытты.

«Сіз менің көзімді нысанаға алдыңыз, бірақ менің жүрегім әлі де соғып тұр. Менің көз жанарымнан айырғандарыңа рақмет. Бұл көптеген адамның көзін ашты», - деді ол сөзін тәртіп сақшыларына арнап.

Сондай-ақ ол жүрегіндегі жарықтың жақсы уақыт келетініне сенуге көмектесетінін айтты.

«Бірақ сіздердің және командиріңіздің жүрегі күн сайын қарайып жатыр. Жақында менде шыны көз болады, ал сізде медаль болады», - дейді Элахе.

BBC агенттігі қауіпсіздік күштері көзіне қасақана оқ атқан 12 ирандықты анықтай алды. Алайда Иранда қанша адамның дәл осындай жарақат алғанын ешкім нақты білмейді. Ауруханада қамауға алынудан қорқып, кейбір белсенді медициналық көмекке мүлдем жүгінбеген.

«Нью-Йорк Таймс» газеті өткен жылдың қыркүйегі мен қарашасы аралығында Тегерандағы үш аурухана көзінен жарақат алған 500 науқасты қабылдағанын анықтады.

Еске салайық, өткен қыркүйектен бері Иранда ондаған мың адам Махса Аминидің өліміне наразылық танытты. Хиджабты дұрыс кимеді деп айыпталған бойжеткен полиция бөлімшесінде қайтыс болған еді.