Қазақстан әлемде интернеті ең арзан елдердің бірі деп танылды. Осы жөніндегі сараптама жасаған Internet Accessibility индексінде  еліміз үздік бестіктен көрінді. 

Дәлірегі Қазақстан әлемде ғаламторы арзан елдердің рейтингісінде бесінші орын алды. Сарапшылардың зерттеуінше, елімізде 1 гигабайт пакет интернеттің құны бар-жоғы  0,9 долларды құрайды. Ал мұндай көлемдегі ғаламтордың бағасы көп елдерде 9-10 долллардан кем емес. Яғни, біздегі баға 10 есеге арзан деген сөз. 

Мәселен, Қазақстанда 15 Гб интернет үшін 13,5 доллар төленеді. Ал ол Германияда — 73,5 доллар,  Жапонияда- 84 доллар, АҚШ-та — 144 доллар, Канадада — 166,5 доллар,  Швейцарияда — 192 доллар тұрады. 

Ал әлемде ең арзан мобильді интернет Үндістанда екен. Сондай-ақ,  ғаламтор Израильде, Ресейде де арзан. 

2021 жылдың 1 сәуіріндегі мәлімет бойынша Қазақстанда интернетке шыға алатын барлығы 16,1 миллион ұялы байланыс абоненті тіркелген. Бір жыл ішінде олардың саны 8 пайызға, ал соңғы бес жылда 45,9 пайызға көбейген. 

2020 жылға мәлімет бойынша 6-74 жас аралығындағы интернет қолданушылардың саны 88,2 пайызға өскен.