Қазақстанда коронавирустың таралуы төмендеп келеді. Бұл туралы Үкімет отырысында ҚР Денсаулық сақтау министрі Алексей Цой айтты.

Министрдің дерегінше, науқастану көрсеткіші бойынша әлемдік рейтингтегі 221 елдің ішінде Қазақстан 108-орында, ал өлім-жітім бойынша 107-орында тұр. 

- Жоғары эпидемиологиялық тәуекел аумағында 10 өңір, атап айтқанда Нұр-Сұлтан, Алматы қалалары, Ақмола, Ақтөбе, Атырау, Батыс Қазақстан, Қарағанды, Қызылорда, Маңғыстау және Павлодар облыстары тұр. Орташа эпидемиологиялық тәуекел аймаққа бүгінде Жамбыл, Шығыс Қазақстан, Алматы және Қостанай облыстары кіреді. «Жасыл» аймақта - Түркістан мен Солтүстік Қазақстан облыстары, - деді министр. 

Оның айтуынша, елімізде 27 сәуірге дейін COVID-19-дың оң нәтижесімен 311 400, ал теріс нәтижесімен 52 431 науқас тіркелген. 

- Науқастанудың күнделікті динамикасы наурыз айының соңындағы 46 пайыздық өсім қарқынының өткен апта ішінде 8 пайызға дейін төмендеуімен сипатталады. Соңғы аптада оның алдындағы аптамен салыстырғанда өлім-жітім өсімі 30-дан 8 пайызға дейін төмендеді. Ахуалдың айтарлықтай тұрақтануы байқалады. Өңірлер аймақтағы эпидемиологиялық ахуалды ескере отырып шектеу іс-шараларын түзетуді және қабылдауды жалғастыруда, - деді Алексей Цой.