"Тақиялы періште" фильмінде Тайлақтың рөлін сомдаған актер Әлімғазы Сұмағұлұлы Райымбеков 85 жасында өмірден өтті. Бұл туралы қайғылы хабарды "Егемен Қазақстан" тілшісі Қалмаханбет Мұқаметқали өз Facebook парақшасында жария еткен. 

- Бақұл болыңыз, Тайлақ... Қазақ өнерінің "Тақиялы періштесі" атанған Әлімғазы ақсақалға уақыт болыпты, - деп жазған ол. 

Әлімғазы Сұмағұлұлы 1936 жылы 1 желтоқсанда Алматы облысында туған. Қазақстанның мәдениет қайраткері. Алматы облысының Құрметті азаматы. Қазақ кино әлемінде өшпес із қалдырған тұлға оннан астам фильмге түскен. 

Оның ішінде "Ән қанатында", "Қилы кезең", "Көгілдір такси", "Қан мен тер", "Тақиялы періште" сынды танымал кинотуындыларды атап өтуге болады. Әсіресе алтын қорға енген комедиядағы Тайлақтың ролі арқылы көрермен қауымға етене таныс. 

Әлімғазы ақсақалдың мәпелеп өсірген 10 баласынан 20 немере, 7 шөбере бар.