Қазақстан президенті Қасым-Жомарт Тоқаевтың айтуынша, карантин кезінде табысынан айырылған 4,5 миллионнан астам азамат 42 мың 500 теңге мөлшерінде көмек алды. Бұл мақсатқа 450 миллиард теңгеден астам қаражат жұмсалды деп хабарлайды Oinet.kz тілшісі. 

- Осындай жәрдем көршілес елдерде, тіпті, басқа ірі мемлекеттерде берілген жоқ, - деді президент бүгін Қазақстан халқына арнаған Жолдауында. 

Қасым-Жомарт Тоқаев Үкіметтің жіберілген қателіктерден сабақ алып, жұмысты жедел жолға қоя білгенін де атап өтті. 

- Ең бастысы – біз азаматтардан ешнәрсені жасырмай, індеттен қайтыс болғандар туралы ақпараттың барлығын ашық жарияладық. Қаншалықты ащы болса да, шындықты айтып отырмыз. Бұл –  кейбір мемлекеттерге қарағанда Қазақстанның ұтымды тұсы.

Алайда, ахуалдың жақсаруы  босаңсуға себеп болмауға тиіс. Күрес әлі жалғасуда. Дүниежүзілік денсаулық сақтау ұйымының болжамы бойынша пандемияны жеңу үшін кем дегенде 2 жыл қажет, - деді президент.