Шымкентте қызметкерлеріне төлемақыны дұрыс төлемеген бас дәрігер қызметінен босатылды

Oinet.kz 19-05-2020

Шымкенттегі стерильдеу орталығының қызметкерлеріне төлемақыны дұрыс төлемеген бас дәрігер қызметінен босатылды. Сондай-ақ, жедел жәрдем орталығында жұмыстарды ұйымдастыру барысында түсіндіру мен жедел жәрдемді бағыттау барысында қызметкерлерге бір деңгейде қосымша қаржы төленбегендігі анықталды. Бұл туралы қала әкімінің бірінші орынбасары Ербол Садыр баспасөз брифингінде мәлімдеген болатын. 

Screenshot_1.jpg

Қаладағы медицина қызметкерлеріне берілетін үстемеақыға қатысты тексеру жұмыстары аяқталған. Естеріңізге сала кетейік, өткен аптада стерильдеу орталығының мамандары басшыларына сенімсіздік танытып, тиесілі үстемеақыны толық алмайтындарын айтқан болатын. 

Сондай-ақ, жедел жәрдем қызметкерлері үстемеақыларын толық көлемде ала алмай отырғандықтарын айтып, наразылық танытқан болатын. Орын алған жағдайларға байланысты Шымкент қаласы әкімінің тапсырмасымен жұмыс тобы құрылып, екі мекемеде де тексеру жүргізіліпті. 

«Тексеру жұмыстарының қорытындысы бойынша стерильдеу орталығының қызметкерлеріне төлемақы мен жәрдемақыларын қосымша төлеу барысында өрескел заңбұзушылықтарға жол берілгені анықталды. Соған байланысты орталықтың бас дәрігері қызметінен босатылды. Ондағы медициналық қызметкерлердің айлықтарының барлығы қайта есептеліп, қосымша жәрдемақылары төленді»,- деді қала әкімінің бірінші орынбасары. 

Ербол Садырдың айтуынша, жедел жәрдем орталығында жұмыстарды ұйымдастыру барысында түсіндіру мен жедел жәрдемді бағыттау барысында қызметкерлерге бір деңгейде қосымша қаржы төленбеген. 

«Осы жағдайды ескере отырып, біз арнайы төлемдердің көлемін жоғарылаттық. Жүргізушілерге 125 мың теңгеге дейін, дәрігерлер мен фельдшерлерге 250 мың теңгеге дейін көтердік. Кіші медициналық персоналдарға «Халық банкінің» демеушілігімен 40 мың теңгеден қосымша қаржы төлеп бердік. Яғни, жедел жәрдем қызметінің мамандарына санаттарына сәйкес қосымша үстемеақылары төленедi. Жедел жәрдем станциясы басшылығына шара қолдану мәселесі қаралуда»,- деді Шымкент қаласы әкімінің бірінші орынбасары.

«Елорда карантинге жабылуы мүмкін бе» - Алтай Көлгінов жауап берді
Сағадат Нұрмағамбетовтың ұлы қайтыс болды

Сәйкес тақырыптар
Көтерілу
×