Санжар Боқаевқа қатысты қылмыстық іс бойынша өтіп жатқан сот отырысында істің негізгі айыпталушыларының бірі жауап беріп, гранит тақталарға қатысты қоғамда үлкен шу туғызған бейнероликтің қалай түсірілгенін егжей-тегжейлі баяндады.

Еске сала кетейік, қылмыстық істің бір эпизоды 2025 жылдың күзінде Үлкен Алматы өзенінің арнасын қайта жаңғырту кезінде құрылыс материалдарының ұрлануына қатысты. Мемлекеттік айыптау тарапының нұсқасы бойынша, Боқаев гранит тақталардың ұрлануын өзі ұйымдастырып, оны бейнежазбаға түсіру арқылы әкімдікті айыптайтын, қаржы жымқыруды «әшкерелеген» атышулы материал жариялауды көздеген.

Ұлан Нүсіпқожа бұл істе жай ғана куәгер емес, Боқаевтың жеке бейнеоператоры болып жұмыс істеген сотталушылардың бірі. Сотта жауап алу барысында Нүсіпқожаның Боқаевпен 2021 жылдан 2023 жылға дейін жұмыс істегені белгілі болды. Бастапқыда ол қосымша табыс табу мақсатында 20 мың теңгеге бейнероликтер монтаждап жүрген. Кейін «Нұр Отан» партиясының бұрынғы идеологы оператордан негізгі жұмыс орындарынан шығып, толықтай өзіне жұмыс істеуге көндірген.

Тіпті әрқайсысының өз рөлі де болған: оператор тек бейне түсіріп, монтаждаумен айналысқан және дайын материалдарды WhatsApp арқылы жіберіп отырған. Ал бейнероликтерді TikTok, Instagram және YouTube желілеріне Боқаевтың өзі жариялаған.

Гранит тақталардың ұрлануын қолдан ұйымдастыру идеясы Боқаевтың ойына әлеуметтік желіден өзге біреудің бейнежазбасын көргеннен кейін келген. Кездейсоқ түсірілім жасаған кофе сатушы құрылыс материалдарының көлікке тиеліп жатқан сәтін телефонына жазып алған екен. «ҚазТрансГаз» басшысының бұрынғы кеңесшісі осы бейнежазбаны операторына көрсетіп, дәл осындай «әшкерелеуші материал» түсіруді талап еткен.

Нүсіпқожа бастапқыда келісімшарт талаптарын алға тартып, түннің бір уағында түсірілімге барудан бас тартқан. Алайда Боқаев оған «алған жалақыңды ақтауың керек» деп жауап берген.

Сотта Нүсіпқожа 10 қыркүйекте белгісіз адамдардың гранит тақталарды ұрлап жатқанын көрсетуге бағытталған алғашқы сәтсіз түсірілімнің қалай өткенін бүге-шігесіне дейін айтып берді.

«Кешкі уақытта, сағат 21:00-22:00 шамасында түсіру керек болды. Менің міндетім – болған жағдайдың бәрін толықтай бейнежазбаға түсіру еді», – деді оператор.

Осы «тергеу жұмысын» үйлестіру үшін Боқаев операторды арнайы жалданған орындаушы Ақылбек Хамракуловпен байланыстырған. Қылмыстық іс материалдарына сәйкес, гранит тақталарды манипулятор көлігімен тасып әкетуді дәл осы адам ұйымдастырған.

Нүсіпқожаның айтуынша, Боқаев жұмысының көптігін сылтау етіп, жұмысшымен тікелей байланысудан қашқақтаған. Барлық тапсырманы тек оператор арқылы жеткізіп отырған.

«Боқаев маған Ақылбектің нөмірін берді. Ол – Боқаевтың үйінің шатырын жөндеп жүрген жұмысшы. «Онымен хабарлас, сол жерде болады» деді. Бірақ ол телефонды көтермей, қоңырауларымды қайта-қайта үзіп тастады. Тек геолокациясын жіберді», – деп түсіндірді Нүсіпқожа сотта.

Оқиға орнына жеткен Нүсіпқожа жақын баруға жүрексінген.

«Тақталардың көлікке тиеліп жатқанын алыстан түсіре бастадым. Кейін жүк тиелген соң көліктің соңынан ердім. Бірақ тақталардың түсірілуін толық түсіре алмадым», – деді ол.

Оның үстіне, Ақылбек құрылыс материалдарын жоспарланған жерге емес, жеке тұрғын үйлер орналасқан аумақтағы бос алаңға түсіріп кеткен.

Нүсіпқожаның айтуынша, түсірілген бейнежазбаны көрген Боқаев ашуға булыққан. Ол сәтсіз таңдалған керексіз түсірілім жайттары үшін Нүсіпқожаны, ал гранит тақталарды жерлеу қызметтерін көрсететін шеберхананың жанына емес, айдаладағы бос жерге түсіргені үшін Ақылбекті бейәдеп сөздермен балағаттаған. Боқаевтың жоспары бойынша, әлеуметтік желілерде мемлекетке тиесілі гранит тақталар құлпытас жасайтын шеберханаға өткізіліп жатқандай көрініс қалыптастыру қажет болған. Боқаев «ақша босқа жұмсалды» деп ашуланып, операторды өзінің ашу-ызаға толы аудиохабарламаларын жұмысшы Хамракуловқа жіберуге мәжбүрлеген. Сонымен қатар Нүсіпқожаны сабырға шақыру үшін болып жатқан әрекеттің ұрлық емес, бар болғаны «ұрланған заттарды сатып алу» екенін айтып, оны сендіруге тырысқан.

Боқаевтың ойынша, әлеуметтік желілерде мемлекеттік меншікке тиесілі гранит тақталар құлпытас жасайтын кәсіпорынға өткізіліп жатқандай көрініс қалыптастыру қажет болған.

Келесі күні қажетті бейнежазбаны түсіру әрекеттері жалғасқан. Боқаев операторды гранит тақталар түсірілген жерге өзі апарып, жолай жерлеу қызметтерін көрсететін қолайлы мекемені тауып алған. Содан кейін Нүсіпқожаға сол жерді бейнежазбаға түсіруді тапсырған. Мақсат – ноутбук арқылы гранит тақталардың шын мәнінде көлікке тиелген сәтін олардың басқа жерде түсірілген жалған түсіру көрінісімен біріктіріп, біртұтас бейнеролик жасау.

Алайда монтаждалған бейнежазба шынайы көрінбеген. Осыдан кейін Боқаев гранит тақталарды тағы бір мәрте ұрлауды ұйымдастырып, бәрін басынан қайта түсіруді тапсырған.

15 қыркүйекте болған оқиғаларға Боқаевтың өзі тікелей қатысқан. Ол операторымен бірге жеке Toyota Land Cruiser 300 автокөлігімен Үлкен Алматы өзенінің бойына келген.

Бұл жолы манипулятордың 12 гранит тақтаны көлікке тиеу процесі Боқаевтың түсініктемелерімен қатар түсірілген. Ол алдын ала дайындап қойған мәтінін айтып, көрерменге жергілікті тұрғындардың шағымы бойынша оқиға орнына жаңа ғана жеткендей әсер қалдыруға тырысқан.

Бесағаш ауылындағы жерлеу қызметтерін көрсететін мекеменің жанында тақталарды көліктен түсіру көрінісі де тікелей түсірілген.

Нүсіпқожаның айтуынша, Боқаевтың көлігі манипуляторға жақындаған кезде жұмысшы Ақылбек белгісіз бағытқа асығыс қашып кеткен. Өйткені ол түсірілім жүргізілетінін алдын ала білген және бейнекадрға түспеуі керек болған.

Нүсіпқожаның сөзінше, Боқаев гранит тақталардың «ұрлануына» қатысты өзінің ашу-ызасын камера алдында білдіріп болған соң, манипулятор жүргізушісіне тақталарды қайта тиеп, өзен жағасындағы бұрынғы орнына апарып қоюды бірден бұйырған.

Монтаждалған бейнеролик 2025 жылғы 17 қыркүйекте әлеуметтік желіде жарияланып, 1,5 миллионнан астам қаралым жинады.