Алматы қаласында бұрынғы шіркеу қызметкері Иаков Воронцов ұсталғаны туралы ақпарат пайда болды. Бұл туралы  журналист Данияр Молдабеков өзінің Telegram-арнасында  жазады,- деп хабарлайды  Оinet.kz порталы.

Журналистің мәліметінше, түнгі уақытта Воронцовтың үйіне күштік құрылым өкілдері келіп, тінту жүргізгеннен соң оны полиция департаментінің изоляторына жеткізген. Ал қалалық полиция әзірге ресми пікір білдірген жоқ.

Воронцовтың адвокаты Ғалым Нұрпейісов те оның ұсталғанын растаған.

Иаков Воронцов – Қазақстанда белгілі болған бұрынғы православ шіркеу қызметкері. Бұған дейін ол қоғам  алдында ашық пікір білдіріп жүрген. Ол 2022 жылы Орыс  православ  шіркеуі жетекшілігін және Владимир Путин режимінің саясаттарын, соның ішінде Украинаға қарсы соғысты ашық айыптағаны үшін жоғары шіркеу иерархиясы тарапынан қызметтен шеттетілгені белгілі.

Ол Ресей-қолданбалы православ шіркеуінен босатылғаннан кейін Қазақстанда Мәскеуден тәуелсіз православ шіркеу құрғысы келген. Бұл үшін Воронцов бірнеше рет бастама көтеріп, Константинополь патриархына Қазақстанда жаңа православ құрылымын ашу туралы петиция жинаған және «діни бірлестігін тіркеуден бас тартқаны үшін» қалалық әділет департаментінің үстінен Алматы әкімшілік сотына шағым түсіргені белгілі. 

Бұған дейін кейбір деректерде оған «экстремизм» бабы бойынша қылмыстық іс қозғалғаны, кейін ол іс тоқтатылғаны хабарланған. Сонымен қатар 2023 жылы әлеуметтік желідегі жазбасына қатысты тергеу жүріп, кейбір пікірлері үшін айыпталған еді. Бірақ кейін  айыптар дәлелденбеді.

Қазір оның ұсталуына қатысты нақты ресми ақпарат жоқ.