Шымкент қаласында Корея Республикасының экологиялық технологияларға маманданған «HAMMSOLz» компаниясының өкілдерімен кездесу өтті. 

Басқосуда парниктік газдар шығарындыларын азайту, полигондарды рекультивациялау және қалдықтарды қайта өңдеу саласындағы ынтымақтастық мәселелері талқыланды. Жиынға жергілікті атқарушы органдардың салалық мамандары, экология және инвестициялар бағытындағы жауапты тұлғалар қатысты.

«HAMMSOLz» – қалдықтарды басқару жүйесін жаңғырту, полигондық газдарды жинау және оны энергия көзі ретінде қайта өңдеу технологияларын енгізу бойынша халықаралық деңгейде жұмыс істейтін компания. Кәсіпорын көптеген елдерде қалдықтарды қауіпсіз өңдеуге арналған инженерлік шешімдер ұсынып, орнықты даму бағытындағы жобаларды іске асырып келеді. Компанияның тәжірибесі полигондардағы газдарды тиімді пайдалану, атмосфераға таралатын зиянды шығарындыларды азайту және қалдықтар инфрақұрылымын қайта жаңарту бағытында жинақталған.

Кездесу барысында кореялық компанияның Қазақстандық серіктесі – «Kazakhstan M-Gas» ЖШС-мен бірлесіп жүзеге асыруды жоспарлап отырған инвестициялық жобасы таныстырылды. Жоба Шымкент қаласының аумағында биоэлектр станциясын салуды көздейді. Инвестиция көлемі 5 млрд теңгені құрайды. Жоспар бойынша станцияның қуаты тәулігіне 2 МВт/сағ шамасында болмақ. Жобаны жүзеге асыру барысында 70 тұрақты жұмыс орны ашылады деп күтілуде.

Ұсынылған биоэлектр станциясы полигон аумағында жиналатын газды жинап, оны электр энергиясына айналдыруға мүмкіндік береді. Компания өкілдерінің айтуынша, биогазды кәдеге жарату технологиясы қалдықтардың шіруі кезінде пайда болатын метан мен өзге де парниктік газдардың ауаға таралуын айтарлықтай азайтады. Бұл өз кезегінде қаланың экологиялық ахуалын жақсартуға және атмосфераға шығатын зиянды заттардың көлемін қысқартуға үлес қосады.

Инвестициялық жобаны жүзеге асыру үшін «Ақтас-1» қатты тұрмыстық қалдықтар полигонына жақын орналасқан 1 гектар жер телімін бөлу қажеттілігі атап өтілді. Кездесуде жердің орналасу ерекшеліктері, инфрақұрылымға қолжетімділік, электр желілерімен және көлік қатынасымен қамтамасыз ету мәселелері қарастырылды. Жер бөлу рәсімдерін заңнамаға сәйкес жүргізу, экологиялық сараптама талаптарын орындау және техникалық-экономикалық көрсеткіштерді нақтылау бағытында тиісті жұмыстар атқарылатыны айтылды.

Жергілікті мамандар жобаның өңір үшін маңызын атап өтті. Олардың айтуынша, биоэлектр станциясының салынуы қалдықтарды басқару жүйесін жетілдіруге, полигондық газды қауіпсіз өңдеуге және энергия көздерін әртараптандыруға мүмкіндік береді. Сонымен қатар, өндірілетін энергия көлемі өңірдің энергетикалық балансына оң әсер етеді. Жаңа жұмыс орындарының ашылуы әлеуметтік-экономикалық дамуға қосымша импульс бермек.

Кездесу барысында тараптар жобаның техникалық параметрлерін нақтылау, жер телімін рәсімдеу және экологиялық талаптарды орындау мәселелері бойынша бірлескен жұмыс топтарын құруға келісті. Компания өкілдері жоба іске қосылған жағдайда Шымкент қаласы өңірде биоэнергетикалық технологияларды енгізуде алдыңғы қатарға шығатынын атап өтті.

Эколог мамандардың пікірінше, мұндай жобалар қаланың экологиялық саясатын жүзеге асыруда маңызды рөл атқарады. Полигондағы газдың бақылаусыз таралуы қоршаған ортаға елеулі зиян келтіретін факторлардың бірі саналады. Ал газды кәдеге жарату жүйесі қалдықтарды қауіпсіз басқаруды қамтамасыз етіп қана қоймай, қосымша энергетикалық ресурс өндіруге мүмкіндік береді.

Жиын қорытындысы бойынша кореялық тарап бастаманы одан әрі пысықтауға және қажетті техникалық дайындық жұмыстарын жүргізуге әзір екенін білдірді. Шымкент қаласының жауапты құрылымдары инвестициялық жобаны қолдау үшін қажетті ақпараттық және ұйымдастырушылық шараларды қолға алатынын жеткізді. Тараптар өзара ынтымақтастықтың өңір үшін экономикалық, экологиялық және әлеуметтік тұрғыдан тиімді болатынын атап өтті.