2025 жылы ұлы ойшыл, ғұлама ғалым Әбу-Насыр әл-Фарабидің туғанына 1155 жыл толуына орай Шымкент қаласындағы Әл-Фараби атындағы ғылыми-әмбебап кітапханада «Әл-Фараби мұрасы – өркениет қазынасы» атты республикалық ғылыми-көпшілік конференция ұйымдастырылды. 

Қала әкімдігінің қолдауымен өткен аталған іс-шара қазақ халқының рухани құндылықтарын жаңғырту, ұлттық сананы тәрбиелеу мақсатында атқарылып жатқан ауқымды жұмыстардың айқын көрінісі болды десек те болады.

Конференцияға еліміздің жетекші жоғары оқу орындарының ғалымдары, мәдениет пен ғылым саласының өкілдері, жастар ұйымдары мен кітапхана қызметкерлері қатысты. Шымкент қаласы әкімінің орынбасары Сәрсен Құранбек конференция ашылуында Әбу-Насыр әл-Фарабидің еңбектерінің бүгінгі заманға өзектілігін атап өтіп, оның философиясы мен идеялары рухани тәрбие мен патриоттық құндылықтарды насихаттауда маңызды рөл атқаратынын баса айтты.

– Бүгін Шымкент шаһарында ұлы ойшыл, ғұлама ғалым Әбу Насыр әл-Фарабидің туғанына 1155 жыл толуына орай өткізіліп жатқан халықаралық ғылыми конференцияның ашылуымен баршаңызды құттықтаймын! Әл-Фараби – адамзат өр­кениетінің биік шыңына көтерілген ұлы тұлға. Оның еңбектері ғылым мен философияның, мәдениет пен адамгершіліктің, парасат пен ізгіліктің мәңгілік ұстанымына айналды. Ұлы ойшылдың «Қайырымды қала» туралы ілімі – бүгінгі заманның рухани, әлеуметтік және мәдени дамуының өзегіне айналып отыр. Сондықтан Фараби мұрасын зерттеу, насихаттау және оның идеяларын қоғам өміріне енгізу – біздің басты борышымыз. Бұл бағытта қаламызда жүйелі жұмыстар атқарылып жатыр. Біз үшін бұл тек ғылыми іс-шара ғана емес, рухани жауапкершілік деп есептеймін. Бүгінгі бас­қосу – тек ғалымдардың диалог алаңы емес, ол – ой мен парасаттың, мәдениет пен өркениеттің тоғысқан ордасы. Сіздердің зерттеулеріңіз бен ұсыныстарыңыз ұлы ойшыл мұрасының терең мағынасын ашып, оны қазіргі қоғамның рухани дамуына үлес қосуға бағытталатынына сенімім мол. Шымкент қаласы әкімдігі әрқашан ғылым мен мәдениеттің, руханият пен білімнің дамуына қолдау көрсетіп келеді. Сөз соңында баршаңызға сәттілік, шығармашылық табыс, игілікті еңбек тілеймін!, – деді Сәрсен Құранбек.

Әл-Фарабидің философиялық мұрасы – қазақ халқының ұлттық сана-сезімін, ел тарихы мен мәдениетін терең түсінуге бағытталған. Конференция аясында ғалымдар ұлы ойшылдың еңбектерін талқылап, оның «Қайырымды қаланың көзқарастары» трактатының заманауи қоғамдағы маңыздылығын ерекше атап өтті. Бұл трактатта адам мен қоғам арасындағы өзара қарым-қатынас, бір-біріне көмек және әділ қоғам құру мәселелері қарастырылады, ол қазақ халқының салт-дәстүрі мен әдет-ғұрпын сақтауда, рухани тәрбиеде маңыздылығын сақтап келеді.

Шымкент қаласындағы Әл-Фараби атындағы кітапхана бұл ғылыми басқосуларды тұрақты түрде өткізіп, рухани құндылықтарды дәріптеу бойынша белсенді жұмыс атқаруда. Жыл басынан бері кітапхана көптеген ғылыми-танымдық және әдеби шараларға, мерекелік кездесулер мен патриоттық кештерге ұйытқы болды. Мысалы, «Бір ел – бір кітап» акциясы аясында қалалық кітапханаларда қазақ әдебиетінің көрнекті шығармалары талқыланып, жастар арасында ұлттық мәдениет пен тарихқа деген қызығушылық ояна түсті.

Сонымен қатар, «Түнгі кітапхана» жобасы аясында Әл-Фараби мұрасына арналған арнайы кештер ұйымдастырылып, жас ұрпаққа ұлы ойшылдың шығармалары мен философиясы заманауи форматта ұсынылды. Бұл іс-шаралар жастардың патриоттық сезімін қалыптастыруға, ұлттық рухани құндылықтарды насихаттауға бағытталған.

Шымкент қаласының кітапханашылары мен мәдени қызметкерлері патриоттық тәрбие мен рухани құндылықтарды ілгерілету мақсатында әлеуметтік жобаларға да белсенді қатысуда. Мысалы, «Кедергісіз кітап» жобасы аясында мүмкіндігі шектеулі азаматтарға және әлеуметтік осал топтарға кітапханалық қызмет көрсету жүйесі ұйымдастырылған. Бұл жобаның маңызды бөлігі ретінде ардагерлер, балалар үйі және мүгедектер орталықтарында әдеби-танымдық шаралар өткізіліп, қоғамның әртүрлі топтарының рухани даму деңгейі көтеріліп келеді.

Қалада балалардың бос уақытын тиімді пайдалану үшін саябақтарда және қоғамдық орындарда жылжымалы кітап көрмелері ұйымдастырылып, ертегі сағаттары, әдеби викториналар мен мәнерлеп оқу сайыстары тұрақты түрде өткізіледі. Бұл шаралар арқылы жастарға ұлттық мәдениет пен дәстүрге деген құрмет сезімі дарытылып, олардың рухани тәрбиесі нығайтылуда.

Шымкент қаласында атқарылып жатқан барлық осы жұмыстар – рухани құндылықтар мен патриоттық тәрбиені қалыптастырудағы жүйелі әрі ауқымды шаралардың айқын көрінісі. Қазақ халқының бай мәдени мұрасын, салт-дәстүрі мен әдет-ғұрпын, ел тарихын насихаттау бағытындағы бұл іс-шаралар ұрпақтар сабақтастығын қамтамасыз етіп, халықтың болмысын тереңірек танып білуге мүмкіндік береді.

Осылайша, Шымкент қаласы ұлттық руханият пен патриотизмді дамытуда үлгі боларлық үлес қосып, қоғамның рухани байлығын арттыруға бағытталған жұмыстарды тұрақты түрде жалғастыруда. Әбу-Насыр әл-Фарабидің мәңгілік мұрасы – осындай мәдени шаралар арқылы жас ұрпаққа өмірлік бағдар болып, ел болашағын кемелдендіруге қызмет етуде.