Шымкент қаласында «Рухани құндылықтар және патриоттық тәрбие» бағытында мемлекеттік тілдің маңыздылығы мен қолданылуын арттыруға бағытталған ауқымды жұмыстар жүргізілуде. 

Соның бір айғағы ретінде, Қазақстан Республикасы Ғылым және жоғары білім министрлігінің Тіл саясаты комитетінің ұйымдастыруымен өткен «Мемлекеттік тіл – Тәуелсіздік символы» республикалық байқауын атап өтсек болады.

Бұл шара 7 қарашада М. Әуезов атындағы Оңтүстік Қазақстан университетінде өткізіліп, еліміздің 11 өңірінен келген әскери сала қызметкерлері – қазақ тілін жетік меңгерген түрлі этнос өкілдері қатысуымен өтті. Байқаудың басты мақсаты – мемлекеттік тілдің қоғамдағы орнын нығайту, оның этносаралық қатынас тілі ретінде кеңінен қолданылуын қамтамасыз ету және қазақ тілін жоғары деңгейде меңгерген азаматтарды қолдау болды.

Шымкент қаласының әскери қызметкері Ахметов Ильгар байқауда І орынға ие болып, қаламыздың рухани-мәдени дамуына үлес қосып, патриоттық тәрбиенің маңыздылығын дәлелдеді. Байқау төрт кезеңнен тұрды, оның барысында қатысушылар қазақ тілінде шығармашылықпен өзін таныстырып, өнерлерін ортаға салды, ой-пікірлерін білдіріп, мақал-мәтел сайысында тапқырлық пен тіл шеберлігін көрсетті.

Қазылар алқасы – филолог ғалымдар, қоғам қайраткерлері мен әскери сала өкілдерінен құралған, қатысушылардың мемлекеттік тілді меңгеру деңгейін әділ бағалап, жеңімпаздарды анықтады. Бұл байқау мемлекеттік тілдің қоғамдағы беделін арттырып қана қоймай, әртүрлі этностардың тілге деген қызығушылығын, патриоттық сезімін оятуда маңызды рөл атқаруда.

Шымкент қаласында осындай байқаулар мен іс-шаралар арқылы қазақ халқының рухани құндылықтары – оның тілі, мәдениеті мен салт-дәстүрі, ұлттық болмысы сақталып, жаңғырып келеді. Мемлекеттік тілдің мәртебесін көтеру – тәуелсіздіктің айқын символы ретінде, ұлттың бірегей рухани негізін нығайтуға бағытталған патриоттық тәрбие жұмыстарының бір бөлшегі болып табылады.

Осылайша, Шымкент қаласы мемлекеттік тілді дамыту арқылы ұлттық сана мен руханиятты бекемдеп, қоғамдағы татулық пен келісімді арттыруға ықпал етіп келеді. Бұл жұмыстар қазақ халқының тарихи және мәдени мұрасын дәріптеумен қатар, патриоттық рухты қалыптастыруда маңызды орын алуда.