Шымкент қаласының инженерлік инфрақұрылымын дамыту – мегаполистің әлеуметтік-экономикалық өсімінің басты бағыттарының бірі. Әсіресе, ауыз сумен қамтамасыз ету мен кәріз жүйесін жетілдіру – тұрғындардың тұрмыс сапасын арттыруға елеулі әсер етеді.

Қалада соңғы жылдары бұл салада ауқымды жұмыстар атқарылып, бірқатар маңызды жобалар жүзеге асырылуда. 

Ауыз сумен қамту: 99,5% көрсеткіш – мегаполис үшін рекорд. Қазіргі таңда Шымкенттегі 81 елді мекеннің 80-і сапалы ауыз сумен қамтамасыз етілген. Жалғыз қалып отырған Құрсай шағынауданы да бұл тізімге қосылуға жақын. Мұнда су құбырлары толық тартылып, абаттандыру жұмыстары жүргізілуде. Бұл – қамту деңгейін 99,5%-ға жеткізуге мүмкіндік берді.

Жалпы қала аумағында 7 186,7 шақырым ауыз су желісі бар. Оның ішінде, 5 080 км – ШЖҚ «Су құбыры және канализация басқармасының» теңгерімінде (тозу – 4,6%), 1 929 км – «Су ресурстары-Маркетинг» ЖШС-не тиесілі (тозу – 56,5%). 

Су көздерінің тәуліктік қуаттылығы – 460 мың м³, ал тұрғындардың орташа тұтынуы бұдан үш есе аз – 145 мың м³. Бұл қаланың алдағы жылдары су тапшылығын сезінбеуіне мүмкіндік береді.

Құрсай жобасы – қала үшін маңызды әлеуметтік жоба. Құрсай екі кезеңнен тұратын ауқымды жоба. 2021 жылы басталған құрылыс бүгінде 98%-ға аяқталған. Жобаға жалпы 5,1 млрд теңге бөлінген. 2025 жылы толық іске қосылады.

2024 жылы қалада 10 су нысанының құрылысы жүргізіліп, оның 6-ы пайдалануға берілді (Сайрам 1–3 кезек, Бозарық 1–3 кезек, Қайтпас-1). Нәтижесінде 27 мың тұрғын жаңа жүйеге қосылу мүмкіндігін алды.

2025 жылы Құрсайдағы жұмыстар жалғасумен қатар, Қызылжар-2 жобасының құрылысы басталады. 213 абонентке арналған бұл жобаның құны – 612 млн теңге.

Қаланың шекарасы кеңейіп, жаңа тұрғын алаптары пайда болуда. Осыған орай, келесі 7 елді мекенге су жүйелерін салу кезең-кезеңімен жоспарланып отыр:

Таскен, Оңтүстік, Ақжайық, Қазығұрт станциясы, Жиделі, Исфиджаб, Гидрогеолог.

Текесу мен Айкөл шағынаудандарында бұрғыланған су ұңғымаларынан сапасыз су шыққан.

Текесуде демеушілік қолдауымен 14 км жаңа құбыр тартылып, тұрғындар толық сумен қамтылды.

Айкөлге Құрсайдағы жоба аяқталғанша, әкімдік аптасына 3 рет су тасымалдауда. Бұл – проблемалық аумақтарға уақытылы қолдау көрсетудің мысалы.

«Су ресурстары-Маркетинг» мекемесі 2025–2026 жылдары 16,5 км құбырды ауыстыруды жоспарлап отыр. Тозу деңгейін жасыл аймаққа түсіру үшін қосымша 50 км желіні жаңарту қажет.

Кәріз жүйесі – қаланың экологиялық қауіпсіздігі мен санитарлық жағдайына тікелей әсер ететін бағыт. Қазіргі уақытта 81 шағын ауданның 26-сы кәрізбен қамтылған, 55-еуінде жүйе жоқ.

Қалада 1 220 км кәріз желісі бар. Оның ішінде, 750 км – басқарма теңгерімінде (тозу – 4,9%), 470 км – «Су ресурстары-Маркетинг» ЖШС (тозу – 73,52%). 2024 жылы қалада 10 ірі нысанның құрылысы жүргізілді. Екі магистралдық коллектор мен сегіз ішкі жүйе салынды. Нәтижесінде қамту көрсеткіші 70%-ға көтерілді.

Ең маңызды жобалардың бірі — Тұраннан КОС-қа дейінгі магистралдық коллектор, ол алты елді мекенде 120 мыңнан астам тұрғынды қамтуға мүмкіндік береді.

Алдағы екі жылда 8 нысанның құрылысы жалғасады. Оның ішінде, Шымсити коллекторы, Мирас–Шапағат-2, Айқап–Түркістан, Достық, Базарқақпа бар. 

Базарқақпа ауылында құрылыс биыл басталып, мердігер анықталған. Сонымен бірге 4 жаңа жобаның ЖСҚ-сы әзірленуде (Қазыбек би, Орынбай ақын, Тәжібаев, Қастеев көшелері).

Шымкенттің демографиялық өсімі, жаңа шағын аудандардың қалыптасуы, құрылыстың қарқынды жүруі инженерлік инфрақұрылымға түсетін жүктемені арттыруда. Бұл бағытта қала әкімдігі мен мердігер мекемелер үздіксіз жұмыс жүргізіп, сумен жабдықтау мен кәріз жүйелерін жаңғыртуға ерекше көңіл бөлуде.

Аталған жобалар қаланың ұзақ мерзімді дамуына жол ашып, тұрғындардың өмір сапасын жақсартуға бағытталған. Мегаполистің 2030 жылға дейінгі даму жоспары да инженерлік инфрақұрылымды кезең-кезеңімен жетілдіруді көздейді.