Жыл санап облыстың экономикалық көрсеткіші жақсарып келеді. Оған облысқа тартылып жатқан инвестициялық жобалардың да қосып отырған үлесі зор. Мемлекеттік бағдарламалар мен жобалардың өңір экономикасына тигізіп жатқан тиімді тұстары да жетерлік.

Түркістан облысының әкімі Дархан Сатыбалдының айтуынша, 10 айда Түркістан облысының әлеуметтік-экономикалық дамуының оң өсіміне қол жеткізілген. Экономиканың басты көрсеткіші болып табылатын жалпы өңірлік өнім көлемі алдын ала есеп бойынша 4 триллион теңгеден асты. Қысқа мерзімді экономикалық өсім 110 пайызды құрады

– Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында елімізде өнеркәсіп әлеуетін толық пайдалану үшін жан-жақты шаралар қабылдау қажет екенін айтты. Жолдауда Президент «Үкімет 17 ірі жобаның тізімін жасады. Онда терең өңдеу тәсілін меңгеруге басымдық берілген. Өз шикізатымыз бен құрал-жабдықтарымызды барынша пайдалану, ірі кәсіпорындарға жапсарлас өндірістер ашу маңызды» деп атап өткендей, біздің облысымызда Сауран ауданы мен Түркістан қаласындағы арнаулы индустриалды аймақтарда стратегиялық маңызы жоғары ірі жобалар қолға алынуда. Кейбірінің ірге тасы қаланып, құрылыс жұмыстары басталып кетті. Сондай-ақ Мемлекет басшысы Жолдауында Мұнай-газ-химия саласын одан әрі дамыту – маңызды міндет екенін атап өтті. Бұл салада да қолға алынған жұмыстар баршылық. Ал өнеркәсіп саласына келетін болсақ, облыс экономикасындағы негізгі үлес өнеркәсіп өндірісіне тиесілі. 

Сондай-ақ ел Президенті Қасым-Жомарт Кемелұлы Жолдауында экономиканың құрылымын өзгертуге баса назар аударуды тапсырды. Инвестиция тарту жұмысын күшейту керектігін айтты. Түркістан өңірінде осы бағытта нақты жұмыстар атқарылып жатыр. Нәтижесінде кіріс көздері ұлғайып, өндіріс орындары көбеюде, – деді Дархан Сатыбалды. 

Аймақта өнеркәсіп өнім көлемі 8,8 пайызға артып, 960 миллиард теңгеден асты. Оның ішінде қайта өңдеуге барынша басымдық берілуде. Есепті кезеңде өңдеу өнеркәсібінде 463 миллиард теңгенің өнімі өндіріліп, өсім 113 пайызға артты. Өсім негізінен тау-кен (105,2%), тамақ (103,5%), жеңіл өнеркәсіп (105,9%), машина жасау (106,7%) және жиһаз (1,6 есе) өндірістері есебінен орын алды. Өңірде өндірісті дамыту үшін энергетика тапшылығын шешу және индустриалды аймақтарға қолайлы жағдай жасау мақсатында, Үкіметке электр энергия бағасын төмендету бойынша ұсыныс енгізіліп, қолдау тапқан. 

Президентіміз Жолдауында назар аударған химия және құрылыс индустриясында да даму қарқыны байқалады. Мәселен, аймақ басшысының айтуынша, облыста Қазақстанның жалпы химия саласы өнімінің шамамен 20 пайызы өндіріледі. Химия кәсіпорындары республика бойынша 100 пайыз фосфор, 81пайыз минералды тыңайтқыштар шығарады. Жалпы аймақта фосфориттің мол қоры бар. 

Жалпы химия саласында жеткен жетістігі көп. Осы салада жұмыс істеп жатқан онға тарта өндіріс ошағы бар. Оның үстінде бұл салаға қажетті кен қоры да жеткілікті. Жалпы 2030 жылға қарай тыңайтқыштардың премиум маркалары (суда еритін фосфор тыңайтқыштары) мен құндылығы жоғары өнімдерді (глифосат, тамақ өнімдері, тіс, фармацевтикалық, электронды бұйымдар, отқа төзімді материалдар) бірнеше мың тоннаға дейін өндіру жоспарлануда. Өңірдегі келесі перспективалық даму бағыты – құрылыс индустриясына тиесілі. Мұндағы өнім көлемі артып отыр. 

Сонымен бірге энергетика тапшылығын шешу мақсатында 1,9 триллион теңгеге жалпы қуаты 2,7 гегават болатын 7 ірі жоба жүзеге асырылады. Оның ішінде Сайрамда қуаты 1000 мегават болатын станцияның құрылысы басталып кеткен. Өңір экономикасын арттыруға бағытталған жобалар осымен тоқтап қалмақ емес. Басқа салаларда да жүзеге асырылып жатқан жобалар көп. Бастысы барлығы да облыс экономикасын арттырып қана қоймай, жаңа жұмыс орындарын ашуға сеп болуда.