Шымкент қаласындағы білім ошақтарында Мемлекет басшысы Қасым-Жомарт Тоқаевтың Жолдауы талқылануда. Мұндай талқылау жиыны қаладағы академик Ә.Қуатбеков атындағы Халықтар достығы университетінде де ұйымдастырылды. Студенттермен өткен жиында Президентіміздің Жолдауындағы экономиканың негізгі бағыттары сөз болды.

Университет басшылары мен оқытушылар құрамы сарапшылық еткен жиында философия ғылымының кандидаты, доцент Қанатбек Бердалыұлы «Әділетті Қазақстанның экономикалық бағыты» атты кезекті Жолдаудың негізгі басым бағыттарына тоқталды. Оның айтуынша, Жолдауда белгіленген жаңа мақсаттар халықтың тұрмыстық жағдайын арттыру мен экономикаға бағытталғаны қуантады екен.

- Президентіміздің жаңа бағдарламалық құжаты экономиканың дамуына негізделгені кездейсоқ емес. Жолдау аясында орта бизнесті дамыту, экспортты ынталандыру, агроөнеркіәсіпті арттыру сияқты міндеттер шешіледі деп ойлаймын. Өскелең ұрпақ пен еңбек адамына назар аударылып отыр. Болашағымыз балалар үшін білім сапасын арттыру, «Келешек» Бірыңғай ерікті қаржыландырылатын жүйесін енгізу жайында айтылды. Ал, қауіпсіз еңбек тұжырымдамасы аясында ауыр өнеркәсіп салаларында жұмыс істейтін азаматтардың еңбек құқықтарын жақсырақ сақтауға мүмкіндік бермек. Бұл – әрқайсымыз үшін маңызды. Сондай-ақ, прогрессивті міндеттер де бар, олар ең алдымен, – су және энергия үнемдейтін технологиялар саласы, жаңартылатын энергия жобаларын жүзеге асыру. Біз болашағымызға батылдықпен қараймыз, ысырапшылдыққа, табиғи ресурстарды ұқыпсыз тұтынуға орын жоқ, оны болашақ ұрпақ үшін сақтауымыз керек. Мемлекет басшысы осы тұрғыда атқарылуы тиіс нақты қадамдарды көрсетті, – деді Қ.Бердалыұлы.

Сарапшылардың  айтуынша, қазіргі таңда студенттердің де өзіндік көзқарасы бар, даму үдерісіне ілескен жастар қалыптасуда. Ел болашағына үн қоса алатын нағыз патриот, білімді жастар жиында өз ойларын да ортаға салды. Мемлекет дамуы үшін маңызды  шешімдерді талқылауға және қабылдауға атсалысатындықтарын жеткізді. Бұл – қоғамның одан әрі демократиялануының айғағы.