Шымкент қаласында халық тұтынатын, әлеуметтік маңызы бар азық-түлік өнімдерінің қоры жеткілікті. Қала әкімі Ғабит Сыздықбековтың айтуынша, бүгінгі таңда дистрибьютерлік компаниялардың қоймаларынан азық-түлік өнімдері тұрақты бағада әрі жеткілікті көлемде босатылып жатыр екен. 

Шымкент қаласы әкімдігінің ауыл шаруашылығы және ветеринария басқармасының мәліметінше, әлеуметтік маңызы бар азық-түлік бағасын тұрақты етіп ұстап отыру мақсатында 6 ірі дистрибьютерлік компаниямен алдын ала келісім жасалған. Келісімге сәйкес, бұл компаниялар қаланы әлеуметтік маңызы бар өнімдермен үздіксіз қамтамасыз етіп отырады әрі белгіленген уақытқа дейін бағаны тұрақты етіп ұстайды. 

Бағаны тұрақтандыруға үлес қосып отырған компанияның бірі – «Мейр-Трейд Distribution Company» жауапкершілігі шектеулі серіктестігі. Бұл компания Шымкент қаласына азық- түлік өнімдерін еліміздің өзге өңірлерінен және шет елдерден алдырады. Компания басшысы қоймада азық-түлік қоры жеткілікті, маңызды деген әлеуметтік азық-түліктердің бағасы тұрақты екенін айтады. 

- Біздің қоймамыздың аумағы 20 мың шаршы метрді құрайды. Қоймамызда ұн, қант, макарон, жарма, өсімдік майы, тұз секілді өнімдердің қоры жеткілікті. Бізден босатылатын өнімдердің бағасында ешқандай өзгеріс жоқ. Бағаны қымбаттатуға ешқандай негіз көріп отырған жоқпыз, - дейді компания директоры Сергей Югай. 

Бұл компанияның қоймасында 1500 тонна ұн мен 1 000 тонна қанат бар. Мұнан кейін журналистер «Тұрар» жауапкершілігі шектеулі серіктестігінің диірменінде болып, ұн өндіру барысымен танысты.

- Біз бидайды мемлекет бекіткен бағамен, яғни, 95 теңгеден алып, әлеуметтік ұнның килограмы 145 теңгеден сатып жатырмыз. Шымкент қаласы бойынша 30 нүктеге күнделікті ұн жеткізіп береміз, - деді аталған компанияның өкілі Мұхаммеджан Халидов. 

Айта кетейік, қазір «Тұрар» компаниясының қорында 2 мың тонна әлеуметтік ұн бар. Бұдан бөлек, 2300 тонна қант қоры бар екен. Бүгінгі таңда, жеңілдетілген бағамен сатылатын ұнның 3 мың, қанттың 2500 тонналық қоры бар. Одан бөлек, дистрибьютерлер мен тауар өндірушілерде 15 мың  тонна ұн, 8 мың тонна қант қоры бар. Қаладағы ұн және қант бағасы қала әкімдігінің тұрақты бақылауында.