Қазақстанда көлік және жол бойындағы инфрақұрылымды жаңғырту бағытында ауқымды әрі жүйелі жұмыстар жалғасуда. Мемлекет басшысы Қасым-Жомарт Тоқаевтың көлік желісін дамыту, елдің транзиттік әлеуетін арттыру және заманауи инфрақұрылым қалыптастыру жөніндегі тапсырмаларын орындау аясында тиісті мемлекеттік органдар кешенді жобаларды жүзеге асырып келеді.

Бұл бағыттағы жұмыстарға Қазақстан Республикасы Көлік министрлігі, «ҚазАвтоЖол» ҰК» АҚ және жергілікті атқарушы органдар бірлесіп атсалысуда. Әсіресе транзиттік әлеуеті жоғары өңірлерде жол бойындағы сервис нысандарын салу және жаңғырту жұмыстарына ерекше басымдық берілуде. Сол өңірлердің қатарында Түркістан облысы да бар.

Бүгінде Түркістан облысында жол бойындағы сервистің 105 нысаны жұмыс істейді. Оның 86-сы ұлттық стандарт талаптарына толық сәйкес келеді. Бұл көрсеткіш өңірде инфрақұрылым сапасының кезең-кезеңімен артып келе жатқанын көрсетеді.

Жалпы республика бойынша қазіргі таңда 1428 жол бойы қызмет көрсету объектісі бар. Олардың 93 пайызы белгіленген сапа және қауіпсіздік стандарттарына сай келеді. Бұл елімізде жол бойы сервисті дамыту жұмыстарының жүйелі түрде жүргізіліп жатқанын айғақтайды.

Халықаралық көлік дәліздерін дамытуда Шымкент қаласының айналма жолы ерекше стратегиялық маңызға ие. Бұл бағыт Қазақстанды көршілес мемлекеттермен байланыстыратын негізгі көлік жүйесінің бір бөлігі болып табылады. Аталған жол көлік ағындарын тиімді бөлуге, транзиттік тасымалдарды жеңілдетуге және өңірлік логистиканы дамытуға ықпал етеді.

Осы бағытта жаңа заманауи жол бойы сервис кешендері іске қосылуда. Соның бірі – Шымкент қаласының айналма жолы бойында орналасқан көпфункционалды сервис кешені. Нысан биыл мамыр айында пайдалануға берілді. Жобаның инвесторы – «PetroRetail» ЖШС.

Жаңа кешен жолаушылар мен жүргізушілерге қолайлы жағдай жасауға бағытталған. Мұнда жеңіл және жүк көліктеріне арналған кең тұрақ аймақтары, сауда және қоғамдық тамақтану орындары, санитарлық-гигиеналық тораптар, ана мен бала бөлмесі, намазхана және демалыс аймақтары қарастырылған. Сонымен қатар кешен жолаушылардың қауіпсіздігі мен жайлылығын қамтамасыз ететін заманауи талаптарға сай жабдықталған.

Түркістан облысында жол бойындағы инфрақұрылымды дамыту жұмыстары одан әрі жалғасуда. Ағымдағы жылдың соңына дейін жеке инвестициялар есебінен тағы 5 жаңа жол бойы сервис нысанын іске қосу жоспарланған. Бұл өңірдегі қызмет көрсету сапасын арттырып, жол инфрақұрылымын жаңа деңгейге көтереді.

Жалпы ел бойынша биыл 37 жаңа жол бойы сервис нысанын пайдалануға беру көзделіп отыр. Бұл көлік қозғалысының қауіпсіздігін арттырып қана қоймай, жолаушыларға қолайлы жағдай жасауға мүмкіндік береді.

Көлік министрлігі жол бойындағы инфрақұрылымды дамыту бойынша кешенді саясатты жалғастыруда. Негізгі мақсат – жүргізушілер мен жолаушыларға сапалы, қауіпсіз және қолжетімді қызмет көрсету жүйесін қалыптастыру.

Сонымен қатар бұл сала шағын және орта бизнестің дамуына да жаңа мүмкіндік ашуда. Жол бойындағы сервис нысандары кәсіпкерлік белсенділікті арттырып, жаңа жұмыс орындарын құруға ықпал етеді.

Жол инфрақұрылымының дамуы еліміздің транзиттік әлеуетін күшейтіп қана қоймай, өңірлердің туристік тартымдылығын арттыруға да оң әсерін тигізеді. Заманауи сервис объектілерінің көбеюі Қазақстан арқылы өтетін халықаралық көлік ағындарын тиімді басқаруға және ел экономикасын дамытуға қосымша серпін бермек.