Түркістан облысында туризм саласы өңір экономикасының маңызды драйверлерінің біріне айналып келеді. Мемлекет басшысы Қасым-Жомарт Тоқаев туризмді ел экономикасының басым бағыттарының бірі ретінде белгілеп, өңірлердің туристік әлеуетін тиімді пайдалану, туристік инфрақұрылымды жетілдіру және инвестиция тарту жөнінде нақты міндеттер қойған болатын. Осы тапсырмалар аясында Түркістан облысында соңғы жылдары туризм индустриясын дамыту бағытында ауқымды жұмыстар атқарылып, нақты нәтижелерге қол жеткізілуде.

Тарихы терең, мәдени мұрасы бай Түркістан бүгінде еліміздің ғана емес, бүкіл түркі әлемінің рухани орталығы ретінде танылып отыр. Қожа Ахмет Ясауи кесенесі бастаған тарихи-мәдени нысандардың тартымдылығы жыл сайын өңірге келетін туристер санының артуына ықпал етуде. Сонымен қатар облыста заманауи туристік инфрақұрылым қалыптастыруға бағытталған жобалар жүзеге асырылып, саяхатшылар үшін қолайлы жағдай жасалуда.

Соңғы сегіз жыл ішінде Түркістан облысына 2,5 миллионнан астам турист келген. Егер 2018 жылы өңірге 186,2 мың турист келген болса, 2025 жылдың қорытындысында бұл көрсеткіш 500 мың адамға жетіп, 2,5 есеге артқан. Бұл – өңірдің туристік тартымдылығының жылдан-жылға күшейіп келе жатқанын көрсететін маңызды көрсеткіш.

Сонымен қатар облыстың тарихи-мәдени және туристік нысандарына 10 миллионнан астам біркүндік келуші тіркелген. Бұл көрсеткіш Түркістанның рухани туризм орталығы ретіндегі мәртебесінің нығайып келе жатқанын аңғартады.

2025 жылдың қорытындысы бойынша орналастыру орындарында демалғандар саны 347,8 мың адамды құрады. Оның ішінде 325 мыңнан астамы – отандық туристер болса, 22,5 мыңнан астамы шетелдік қонақтар. Табиғи аумақтарға келушілер саны да артып, 151,9 мың адамға жетті. Бұл өңірде экологиялық туризмге деген қызығушылықтың да өсіп келе жатқанын көрсетеді.

Туризм саласындағы оң динамика 2026 жылдың алғашқы айларында да сақталды. Биылғы жылдың бірінші тоқсанында орналастыру орындарында демалғандар саны 87,1 мың адамды құрап, өткен жылдың сәйкес кезеңімен салыстырғанда 42 пайызға артты. Бұл көрсеткіш туристік қызметтерге деген сұраныстың тұрақты өсіп келе жатқанын дәлелдейді.

Туризмді дамытудағы басты бағыттардың бірі – инвестиция тарту. Түркістан облысы құрылғаннан бері туризм саласына тартылған инвестиция көлемі 612 миллиард теңгеден асты. Нәтижесінде 19,2 мың жаңа жұмыс орны құрылып, мыңдаған тұрғын тұрақты табыс көзіне ие болды. Бұл туризмнің тек мәдени немесе әлеуметтік сала ғана емес, экономиканың маңызды секторына айналғанын көрсетеді.

2025 жылдың қорытындысында туризм саласындағы негізгі капиталға салынған инвестициялар көлемі 133 миллиард теңгені құрады. Оның ішінде тұру және тамақтану қызметтері саласына 78,6 миллиард теңге, ал өнер, ойын-сауық және демалыс бағыттарына 54,4 миллиард теңге инвестиция бағытталған.

Инвестициялық белсенділік биыл да жоғары қарқынмен жалғасуда. 2026 жылдың алғашқы бес айында туризм саласына 36,3 миллиард теңге инвестиция тартылып, өткен жылдың сәйкес кезеңімен салыстырғанда 2,5 есеге өсті. Оның ішінде 31,3 миллиард теңге қонақ үй және тамақтану қызметтері саласына, ал 5 миллиард теңге мәдениет, ойын-сауық және демалыс бағыттарына салынған.

Өңірде туристік инфрақұрылымды дамыту мақсатында соңғы жылдары бірнеше ірі жоба жүзеге асырылды. Түркістан қаласының мәдени-рухани орталығында халықаралық деңгейдегі «Керуен Сарай» көпфункционалды туристік кешені пайдалануға берілді. Сонымен қатар бес жұлдызды «Rixos Turkistan» қонақ үйі іске қосылып, өңірге келетін туристер үшін жоғары деңгейдегі қызмет көрсету мүмкіндігі қалыптасты.

Экологиялық туризмді дамыту бағытында да нәтижелі жұмыстар жүргізілуде. Төлеби ауданында орналасқан «Alma-Tau» қонақ үй кешені табиғат аясында демалуды қалайтын туристер үшін тартымды орынға айналып келеді. Мұндай жобалар облыстың туристік бағыттарын әртараптандыруға мүмкіндік беруде.

Қазіргі таңда Түркістан облысында 264 орналастыру орны жұмыс істейді. Олардың қатарында қонақ үйлер, хостелдер, демалыс аймақтары және балалар сауықтыру лагерьлері бар. Бұл көрсеткіш 2018 жылмен салыстырғанда екі есеге жуық артқан. Ол кезде өңірде небәрі 148 орналастыру нысаны болған.

Туризм саласының дамуы көрсетілетін қызмет көлемінің артуынан да байқалады. 2025 жылдың қорытындысы бойынша орналастыру орындарында көрсетілген қызмет көлемі 8,5 миллиард теңгені құрап, 2018 жылмен салыстырғанда жеті есеге өсті. Ал биылғы жылдың бірінші тоқсанында бұл көрсеткіш 2,2 миллиард теңгеге жетті.

Түркістан облысының әкімі Нұралхан Көшеровтің тікелей бақылауымен өңірдің туристік әлеуетін тиімді пайдалану, жаңа инвестициялық жобаларды тарту, туристік инфрақұрылымды жетілдіру және қызмет көрсету сапасын арттыру бағытындағы жұмыстар жүйелі түрде жалғасып келеді. Сонымен қатар халықаралық және ішкі туризмді дамытуға бағытталған жаңа жобалар қолға алынуда.

Жалпы алғанда, Түркістан облысында туризм саласын дамыту бағытында атқарылып жатқан жұмыстар өңір экономикасының өсуіне, жаңа жұмыс орындарының ашылуына және халықтың әл-ауқатының артуына оң әсер етуде. Туризм индустриясының қарқынды дамуы Түркістанның халықаралық деңгейдегі туристік орталық ретіндегі мәртебесін нығайтып, өңірдің инвестициялық тартымдылығын арттыра түсуде. Алдағы уақытта да бұл бағыттағы жұмыстар жалғасып, Түркістанның Орталық Азиядағы жетекші туристік орталықтардың біріне айналуына негіз қаламақ.