Төлеби ауданының әкімі Еркеғали Әлімқұловтың Өзбекстан Республикасына жасаған жұмыс сапары аясында Қазақстан Республикасының Өзбекстан Республикасындағы Төтенше және өкілетті елшісі Бейбіт Атамқұловпен маңызды кездесу өтті. Кездесу екі ел арасындағы өңіраралық ынтымақтастықты нығайту және бірлескен жобаларды дамыту мәселелеріне арналды.

Жиында Қазақстан мен Өзбекстан арасындағы стратегиялық әріптестікті одан әрі дамыту, сауда-экономикалық байланыстарды кеңейту, инвестициялық ынтымақтастықты арттыру және туризм саласындағы бірлескен бастамаларды жүзеге асыру мәселелері жан-жақты талқыланды. Тараптар екі мемлекет арасындағы достық қарым-қатынастың жоғары деңгейде дамып келе жатқанын атап өтті.

Аудан әкімі Төлеби ауданының әлеуметтік-экономикалық даму көрсеткіштері мен инвестициялық әлеуеті жөнінде кеңінен баяндама жасады. Ол өз сөзінде ауданның туризм, ауыл шаруашылығы, қайта өңдеу өнеркәсібі және шағын және орта бизнес салаларында айтарлықтай мүмкіндіктерге ие екенін атап өтті. Сонымен қатар шетелдік және отандық инвесторлар үшін қолайлы жағдай жасау бағытында атқарылып жатқан жұмыстарға тоқталды.

Сондай-ақ Төлеби ауданы мен Ташкент облысының Бостанлық ауданы арасында бұрын қол қойылған ынтымақтастық туралы меморандумның маңызы ерекше атап өтілді. Бұл құжат екі өңір арасындағы өзара байланыстарды нығайтуға, тәжірибе алмасуға және бірлескен жобаларды жүзеге асыруға негіз болатыны айтылды.

Өз кезегінде Қазақстан Республикасының Өзбекстандағы Төтенше және өкілетті елшісі Бейбіт Атамқұлов екі ел арасындағы достық және тату көршілік қатынастардың қарқынды дамып келе жатқанын атап өтті. Оның айтуынша, өңіраралық байланыстарды кеңейту Қазақстан мен Өзбекстан арасындағы стратегиялық серіктестікті жаңа деңгейге көтеруге ықпал етеді.

Кездесу барысында туризм саласын дамыту, бірлескен инвестициялық жобаларды іске асыру, ауыл шаруашылығы өнімдерінің экспорттық әлеуетін арттыру және кәсіпкерлер арасындағы тікелей байланыстарды нығайту мәселелеріне ерекше назар аударылды. Тараптар болашақта нақты жобаларды бірлесе жүзеге асыруға дайын екендіктерін білдірді.

Кездесу қорытындысында екі тарап өзара тиімді әріптестікті одан әрі дамытуға, тәжірибе алмасуды күшейтуге және өңіраралық ынтымақтастық аясында жаңа бастамаларды қолдауға ниетті екендерін растады. Бұл өз кезегінде Төлеби ауданының халықаралық байланыстарын кеңейтуге және өңірдің әлеуметтік-экономикалық дамуына серпін бермек.