Түркістан облысында жүзеге асырылып жатқан «Ішімдіксіз ауыл» жобасы өңірдегі қоғамдық қауіпсіздікті нығайтып, салауатты өмір салтын қалыптастыруда маңызды рөл атқарып отыр. Соңғы жылдары бұл бастамаға қолдау білдірген елді мекендер саны артып, тұрғындардың зиянды әдеттерден саналы түрде бас тартуға деген ұмтылысы күшейгені байқалады.

Аталған жоба аясында Мақтаарал ауданы көш бастап тұр. Бүгінде бұл ауданда 20 ауыл алкоголь өнімдерін сатудан толықтай бас тартқан. Соның ішінде Бірлік ауылдық округіне қарасты Табысты ауылы ерекше үлгі ретінде аталады. Мұнда 250-ге жуық отбасы, 1600-ден астам тұрғын өмір сүреді. Ауыл билері мен ақсақалдарының бастамасымен қабылданған шешімнің нәтижесінде соңғы бес жылда елді мекенде бірде-бір қылмыс тіркелмеген. Бұл – ішімдіктен бас тартудың нақты әрі тиімді нәтижесін көрсететін айқын дәлел.

Табысты ауылындағы оң өзгерістер жергілікті құқық қорғау органдары тарапынан да жоғары бағаланған. Аудандық полиция бөлімі бастығы қылмыстың алдын алуға және қоғамдық тәртіпті сақтауға үлес қосқан ауыл белсенділері мен ақсақалдарын арнайы Алғыс хаттармен марапаттаған. Бұл өз кезегінде тұрғындардың бастамаға деген сенімін арттырып, басқа ауылдарға да үлгі болуда.

Расымен де, мұндай игі тәжірибе көрші елді мекендерге де оң ықпалын тигізіп отыр. Қ.Пернебаев және Төрткүл ауылдарының тұрғындары да бұл бастаманы қолдап, ішімдіктен бас тартуға ниет білдірген. Осылайша «Ішімдіксіз ауыл» жобасы бір ауылмен шектелмей, тұтас өңірге таралып келе жатқан қоғамдық қозғалысқа айналып отыр.

Жалпы, бұл жоба тек құқықбұзушылықтың алдын алумен ғана шектелмейді. Оның басты мақсаты – қауіпсіз, дені сау және рухани тұрғыдан бай қоғам қалыптастыру. Ішімдіктен бас тартқан ауылдарда қоғамдық тәртіп нығайып, отбасылық құндылықтар күшейіп, тұрғындардың өмір сүру сапасы арта түскені байқалады. Әсіресе жастар арасында спортқа, білімге және еңбекке деген қызығушылықтың артқаны көңіл қуантады.

Жобаның басты ерекшеліктерінің бірі – оның еріктілік қағидатына негізделуі. Яғни, ауыл тұрғындары бұл шешімді ешқандай мәжбүрлеусіз, өзара келісім арқылы қабылдайды. Мұндай тәсіл бастаманың ұзақ мерзімді әрі тұрақты болуына мүмкіндік береді. Халықтың саналы түрде зиянды әдеттен бас тартуы – қоғамның рухани деңгейінің жоғарылағанын көрсететін маңызды көрсеткіш.

Сонымен қатар, мемлекет тарапынан да алкоголь өнімдерін тұтынуды азайтуға бағытталған шаралар жүйелі түрде жүзеге асырылуда. Заңнама күшейтіліп, алкоголь өнімдерін сату уақытына шектеулер енгізілген. Кәмелетке толмағандарға алкоголь сатуға бақылау күшейтіліп, құқық бұзғандарға қатаң шаралар қарастырылған. Ақпараттық-насихат жұмыстары да кеңінен жүргізіліп, білім беру ұйымдарында салауатты өмір салтын қалыптастыруға бағытталған арнайы бағдарламалар енгізілген.

Тәуелділіктен арылуға бағытталған реабилитациялық орталықтардың да маңызы зор. Мұнда білікті мамандар азаматтарға медициналық және психологиялық көмек көрсетіп, олардың қоғамға қайта бейімделуіне жағдай жасайды. Осындай кешенді қолдау нәтижесінде көптеген адамдар зиянды әдеттен арылып, қалыпты өмірге қайта оралуда.

Айта кету керек, бұл бастама тек ауылдық жерлерде ғана емес, қалалық ортада да қолдау табуда. Түркістан қаласының өзінде 40-тан астам дүкен мен супермаркет алкоголь өнімдерін сатудан бас тартқан. Бұл – қаланың рухани мәртебесіне сай келетін маңызды қадамдардың бірі. Мамандар мұндай бастамалар қаланың мәдени және әлеуметтік дамуына оң әсер ететінін атап өтуде.

Жобаның жүзеге асуына құқық қорғау органдарының да қосып отырған үлесі зор. Учаскелік полиция инспекторлары күнделікті профилактикалық жұмыстар жүргізіп, тұрғындармен тығыз байланыс орнатқан. Әрбір үйді аралап, түсіндіру жұмыстарын жүргізу арқылы олар қоғамдағы тәртіп пен қауіпсіздікті қамтамасыз етуге атсалысуда. Соның нәтижесінде соңғы жылдары ішімдіктен бас тартқан ауылдарда құқықбұзушылық фактілері тіркелмеген.

 Түркістан облысында жүзеге асырылып жатқан «Ішімдіксіз ауыл» жобасы – қоғамдағы оң өзгерістердің нақты көрінісі. Бұл бастама халықтың денсаулығын жақсартумен қатар, қоғамдық қауіпсіздікті нығайтып, ұлттық құндылықтарды дәріптеуге жол ашуда. Ең бастысы – бұл тәжірибе еліміздің басқа өңірлеріне де үлгі болып, болашақта кеңінен таралуына негіз қалайды. Салауатты әрі қауіпсіз қоғам құру – баршамызға ортақ міндет және осы бағыттағы жұмыстар алдағы уақытта да жалғасын таба бермек.