Түркістан облысы Шардара ауданының әкімі Қайрат Жолдыбай және ҚР сыбайлас жемқорлыққа қарыс іс-қимыл агенттігі Түркістан облысы бойынша департаментінің Сарыағаш аймағы бойынша ауданаралық басқармасының басшысы Сапар Жантөреев, Шардара ауданы бойынша дәрілік заттардың өткізілуі және шекті бағаның сақталуына мониторинг жүргізу жөніндегі штаб мүшелерімен бірге дәріханаларды аралады. Бұл туралы Шардара ауданы әкімдігінің баспасөз қызметі хабарлады. 

Дәріханаларда дәрілік заттардың қолжетімділігін, шекті бағадан жоғары өткізу фактілерін, заңсыз саудалау және түбіртексіз өткізу деректерін қарады.

Аралау барысында аудан басшысы дәріхана иелеріне арнайы бекітілген дәрі-дәрмектерді тек рецептімен босатуды, 1 азаматқа белгіленген дәрілерді 2 данадан артық сатпауды, Денсаулық сақтау министрлігі бекіткен шекті бағаларды сату барысында қатаң сақтауды және маскалық режимді үнемі бақылауда ұстауды айтты.

Сондай-ақ, аудан әкімі штаб мүшелеріне анықталған кемшіліктер бойынша заңға сәйкес тиісті жұмыстарды атқаруды тапсырды. Сонымен қатар, дәріхана иелеріне Түркістан облысы бойынша дәріханаларда дәрі-дәрмек бағасының көтерілу дерегі тіркелген жағдайда кез-келген тұтынушы шағым түсіре алатындығы түсіндірілді.

Жалпы Түркістан облысында қолға алынған шаралардың нәтижесінде дәрі-дәрмек тапшылығы жойылды.