Ресейдің Екатеринбург қаласында 3 ақпанға жоспарланған комик Нұрлан Сабуровтың концерті өтпейтін болды.

ЕЖ  Telegram-арнаның мәліметінше, іс-шараға билеттер концертке бір апта қалғанда толық сатылып кеткен. Алайда ұйымдастырушылар концерттің кейінге шегерілгенін растады. Олар мұны «еңсеруге болмайтын мән-жайлармен» байланыстырған.

Ұйымдастырушылардың хабарлауынша, билеттер үшін төленген қаражат сатып алушыларға 10 күн ішінде автоматты түрде қайтарылады.

Айта кетейік, Нұрлан Сабуровтың Ресейдің бірқатар қалаларында жоспарланған концерттері 2025 жылдың желтоқсан айынан бастап жаппай тоқтатыла бастады. Бұған комиктің кейбір әзілдері себеп болуы мүмкін. Атап айтқанда, оның Қазақстанға қоныс аударған ресейліктерді акцентпен «мигранттар» деп атауы және «Что было дальше?» шоуының бір шығарылымында Иса пайғамбарға қатысты айтқан әзілі қоғамда кең резонанс тудырған.