Нұр-Сұлтанда «Қазақстан» орталық концерт залында «Үздік педагог» республикалық байқауының жеңімпаздарын құттықтау рәсімі өтіп жатыр. Білім министрі Асхат Аймағамбетов мемлекетімізді, болашағымызды жарқын ету жолында ең алдыңғы қатарда тұрған мамандықтардың бірі мұғалім екенін айтып, ерекше құрмет көрсетті, деп хабарлайды OINET.KZ сайтының тілшісі inform.kz сайтына сілтеме жасап.

«Елбасымыз Нұрсұлтан Назарбаев егемендік алғаннан бастап, білім, ғылым саласына ерекше көңіл бөлуде. Оны өздеріңіз де жақсы білесіздер. Елбасымыздың салиқалы саясатының арқасында жалпы мемлекетіміз, білім саласы биіктерден көрініп, жетістіктерге қол жеткізуде. Қазір осы жұмыс жалғасуда. Мемлекет басшысы Қасым-Жомарт Тоқаев өзінің сайлауалды бағдарламасында білім, ғылым саласын дамытуға үлкен назар аударып, біздің алдымызға нақты мақсат-міндет қойды. Биылғы жылы Тамыз конференциясынада Мемлекет басшысы өзі қатысып, ұстаздарға алғысын білдірді. 4 жылдың ішінде ұстаздардың жалақысын 2 есе көтеру, білім саласын дамыту бойынша үлкен мақсат жүктеді. Осы бағытта жұмыс істеп жатырмыз»,- деді білім министрі.

Министр Педагогтардың мәртебесі туралы заңның әзірленіп, қазіргі уақытта аталған құжаттың Парламент қабырғасында қаралып жатқандығын атап өтті.

«Осы заңды іске асыру үшін бюджеттен де қомақты қаражат қарастырылып отыр. Бүгінгі күннің өзінде 3 триллионнан астам қаражат қаралды. Бұл біздің ұстаздарға, жалпы білім саласына деген үлкен құрмет. Әрине, проблемалар жоқ емес, бар. Біз оның барлығын білеміз. Оны мұғалімдермен, ата-аналармен, қоғаммен бірге шешеміз. Ұлы ұстаз, ағартушы Ахмет Байтұрсынов: «Маған бәрінен де ұстаз, мұғалім жақын. Мұғалім мектептің жүрегі» дегенін білесіздер. Сондықтан мұғалімдерге қанша мадақтама айтып, қаншама жақсылық жасасақ та көп болмайды. Себебі мұғалімдердің жұмысы өте маңызды. Мемлекетімізді, болашағымызды жарқын ету жолында ең алдыңғы қатарда тұрған мамандықтардың бірі екенін білеміз»,- деді Асхат Аймағамбетов.