Шымкент қаласында мамыр айында тұрғындардың қауіпсіздігін қамтамасыз етуге бағытталған бірқатар жедел-профилактикалық іс-шаралар қолға алынды. Аталған шаралар қоғамдық тәртіпті нығайтып, құқықбұзушылықтың алдын алуға бағытталған.

15 мамыр күні басталған «Уылдырық» жедел-профилактикалық іс-шарасы 30 мамырға дейін жалғасады. Іс-шара барысында қала аумағындағы өзен-көлдерде рұқсатсыз балық аулау деректерінің алдын алу, табиғи ресурстарды қорғау және заңсыз балық аулаумен айналысатын азаматтарды анықтау жұмыстары жүргізілуде. Мамандар табиғат байлығын қорғау – әрбір азаматтың ортақ міндеті екенін атап өтуде.

Сонымен қатар, 17-25 мамыр аралығында «Қауіпсіз жол» жедел-профилактикалық іс-шарасы өтеді. Бұл шараның негізгі мақсаты – жол-көлік оқиғаларының алдын алу, жүргізушілер мен жаяу жүргіншілердің жол қозғалысы ережелерін сақтауын қадағалау. Құзырлы орган өкілдері жолдағы қауіпсіздікке бейжай қарамауға шақырып, әрбір адамның өмірі мен денсаулығы жол мәдениетіне тікелей байланысты екенін ескертеді.

Ал 18-28 мамыр күндері аралығында «Балалар қауіпсіздігі» атты іс-шара ұйымдастырылуда. Аталған шара барысында балалардың қауіпсіздігін қамтамасыз ету, олардың құқықтарын қорғау және түрлі келеңсіз жағдайлардың алдын алу мәселелеріне ерекше назар аударылады. Мамандар ата-аналар мен білім беру ұйымдарын балаларға қауіпсіздік талаптарын тұрақты түрде түсіндіріп отыруға шақырады.

Қала аумағында өткізіліп жатқан мұндай профилактикалық шаралар қоғамдық қауіпсіздікті күшейтіп, тұрғындардың құқықтық сауаттылығын арттыруға өз үлесін қоспақ.

Боранбай Бақытжан Бауыржанұлы,

Шымкент ҚПД ӘПБ ППП 2 рота қызмет инспекторы полиция аға лейтенанты