Ресейдің Саратов облысында түрлі ұлт өкілдері арасында жанжал болды деп хабарлайды Oinet.kz тілшісі Baq.kz порталына сүйеніп. 

СарИнформ мәліметіне сүйенсек, бүгін Саратов облысындағы Дергачи елді мекенінде қазақ және күрд диаспоралары арасындағы жанжал шиеленісе түскен.

Ұрыс-керіс негізінен 21 қазанда жас қазақ баласын әскерге шығарып салу барысында басталған көрінеді. Түрлі ұлт өкілдері арасында ішімдік ішу салдарынан төбелес басталған, оған жанжалды бастағандарды қолдайтындар қосылған.

Кейіннен Дергачиде тұратын күрдтер өз ағайынын көмекке шақырған.

Жанжалдасқан күрдтер мен қазақстарға екі жақтың ақсақалдары басу айтып тоқтатқан. Сонымен қатар оқиға орнына полиция да жеткен.

Келесі күні полиция бөлімінде дауды бастаған күрдтің әкесі мен қазақтар тарапынан ақсақал кездесіп, бір-біріне еш наразылығы жоқ екенін айтып, жанжалды шешуге атсалысуға уағдаласқан.Алайда уәде ұзаққа созылмай бүгін тағы да бір жанжал болған.

- Бүгін Дергачиге басқа аудандардан күрдтер жиналып, жергілікті қазақтарға сес көрсетпек болды. Олардың айтуынша, қазақтар арандатушылықтың арқасында ұлттық өшпенділікті туындатты. Ал күрдтердің міндеті бір-бірін зәбірлеуге жол бермей, көмекке келу, - деп атап өтті дереккөз.

Дергачиге кешке құқыққорғау органдары басшыларымен қоса Саратов облысының вице-губернаторы Игорь Пивоваров да барды.

- Олар (жанжалдасқандар - ред.) тағы бірдеңе бастамақ болды. Алайда полиция дер кезінде оқиға орнына келді. Біз кетіп қалдық. Қазір ол жерді тиісті органдар күзетіп жатыр. Бәрі тыныш, - деді ол.

Ал Саратов облысы ІІМ хабарлауынша, 24 қазанда полиция қызметкерлері Саратов облысы Дергачи ауданының тұрғындары арасындағы жанжалдың алдын алды. 

- Жедел әрекет етудің арқасында қоғамдық тәртіпті бұзуға жол берілмеді. Жанжалдасқандардың арасында зардап шеккендер жоқ. Қазір аталмыш дерек бойынша тексеру жұмыстары жүріп жатыр, - делінген ведомство мәліметінде.