Ауыл шаруашылығы өнімдерінің қол жетімділігін қамтамасыз ету мақсатында Түркістан қаласы, Отырар шағын ауданында азық-түлік тауарларының жәрмеңкесі ұйымдастырылды. 

Оған облыстың барлық ауданы мен Түркістан қаласы тауар өндірушілерінің және тұрақтандыру қорының өнімдері шығарылды. Биыл диқанның көңілі тоқ. Жер ана да берекесін беріп-ақ тұр. Жер емген диқанға жәрмеңке үлкен қолдау болып тұр.

Түркістан облысы ауыл шаруашылығы басқармасының басшысы Нұрбек Бадырақовтың айтуынша, биыл елімізде дәнді дақылдар жинаудан рекордтық көрсеткішке қол жеткізіліп, егіс алқаптарын әртараптандыру жұмыстары жүргізілуде, саланы жеңілдікті қаржыландыру көлемі 580 миллиард теңгеге дейін арттқан. 

- Мемлекет басшысының Жолдауында белгіленген қазақстандықтардың тұрмыс сапасын жақсартуға, еліміздің ұзақмерзімді әлеуметтік-экономикалық мақсаттарына қол жеткізуге бағытталған негізгі басымдықтар ауыл шаруашылығына тиесілі. Ауыл шаруашылығы – экономиканың маңызды салаларының бірі. Бүгінде халықтың 37 пайыздан астамы ауылдық жерлерде тұрады, ал ауыл шаруашылығы өндірісінің даму деңгейі қазақстандықтардың көпшілігінің әл-ауқатына тікелей әсер етеді. Еліміз кең байтақ аумағы мен қомақты ресурстарының болуы арқасында үлкен әлеуетке ие. Мемлекет жеңілдетілген қаржыландыру мен субсидиялар беру арқылы аталған секторды белсенді түрде қолдайды, сондай-ақ ауылшаруашылық техникасының өндірісі мен лизингі көлемінің өсуін ынталандырады. Аталған шараның барлығы өз нәтижесін беруде: биыл еліміздің диқандары дәнді дақылдар жинаудан рекордтық көрсеткішке қол жеткізді. Президент тапсырмаларын орындау аясында агроөнеркәсіп кешенін (АӨК) қаржыландырудың қолжетімділігі қамтамасыз етілді. Саланы жеңілдікті қаржыландыру көлемі алғаш рет рекордтық 580 миллиард теңгені құрап, бұл қаражат егіншілерге тікелей несие беру, пайыздық мөлшерлемені төмендедіп, форвардтық сатып алуға бағытталды. 2025 жылы қаржыландыру көлемін 700 миллиард теңгеге дейін жеткізу жоспарланып отыр. Қолайлы күзгі ауа райы егін жинау кезіндегі жауын-шашынға қарамастан, науқанды айтарлықтай шығынсыз өткізуге мүмкіндік берді. Оның әсері жақсы болғаны біздің өңірге де жақсы сезіліп отыр. Түркістан облысы да биылғы жылды табысты аяқтап, мол азық-түлік қорын жинай алды, - дейді басқарма басшысы.

Жалпы Түркістан қаласы, Отырар шағын ауданында үйымдастырылған жәрмеңкеде ет, сүт, ауыл шаруашылығы өнімдері тиімді әрі арзан бағада ұсынылып, халық күнделікті тұтынатын әлеуметтік маңызы бар 19-дан астам тауар түрі нарықтағы бағадан 40-50 пайызға төмен бағада өткерілді. 

Басқарма басшысының айтуынша, нан бөлкесінің бағасы 70 теңге болса, жұмыртқа данасы 40 теңге, тұз – 45 теңге, ал пияз – 77 теңгеден сатылған. Картоп пен сәбіз – 100 теңге, І сұрыпты бидай құны – 190 теңге, күнбағыс майы – 520 теңгеден бағаланды. Тұрғындар қолжетімді өнімдер үшін ризашылығын білдірді. Жалпы өңірде баға тұрақтылығын сақтау бағытындағы жәрмеңкелер «Түркістан әлеуметтік-кәсіпкерлік корпорациясы» акционерлік қоғамы бастамасымен тұрақты түрде өткізіліп келеді.

Жәрмеңкеге келген жұрттың да қарасы қалың. Барлық сөре азық-түлікке, көкөніс пен мал өнімдеріне сықа толып тұр. Алушы да сатушы да дән риза. Өйткені баға жүйелі. 

Шағын жүк көлігіне картоп, пияз бен сәбіз, асқабақ пен қырыққабатты басып келген «Бейбіт» шаруа қожалығының жетекшісі Бейбіт Әбирбеков ауыл шаруашылығы жәрмеңкесінің тұрақты қатысушысы болып шықты. Ол өз жеке шаруа қожалығында күтіп-баптаған өнімін үнемі жәрмеңкелерге әкеліп өткеріп жүргенін айтты.  

- Осы кәсіппен айналысқаныма 12 жыл болды. Бұрын баптаған өнімімізді қайда өткерерімізді білмей бүлдіріп алған кездеріміз аз болмады. Ауыл шаруашылығы жәрмеңкесі біздің негізгі өткізуші орталыққа айналды. Бұған дейін қатысқанымда бір келгенде екі-үш тонна көкөністі бірақ артып алып келетінмін. Бәрі қалмай өтіп келтеді. Көкөнісімді бұған дейін Астана, Алматы қалаларында ұйымдастырылған жәрмеңкелерге де шығарғанмын. Жәрмеңкеге қатысқалы бері тұрақты алымсақ та таптым. Үйден де, алқап басынан да келіп алып кететіндер бар. Бір сөзбен айтқанда, биліктің қолдауын сезініп отырмын. Қазір өнімімді қайда өткіземін деп қиналмайтын болдым, - дейді кәсіпкер. 

- Төлебилік «Бірлік» шаруа қожалығы 250 литр шит майын, ал «Айгерім» ЖК 25 килограмм макорон өнімдерін жеткізіпті. Сонымен бірге сүт және қымыз өнімдерін сөреге қойыпты. Сатушысы Қанат Болатқұл макорон өнімдерінің тез өтіп кеткенін айтты. «Жәрмеңкеге макорон өнімдерінің 10 түрін әкелген едік. Қазір тоғыз түрінен бір-екі қалтадан қалды. Қалғанын жұрт талап әкетті. Сұраныс түсіп жатыр», -деді ол. 

Қала тұрғындары да жәрмеңкенің апта сайын өткізіліп тұрғаны құптайды. «Жәрмеңкенің тұрақты өткізіліп тұрғаны құптарлық іс. Жылда өзімізге керекті азық-түлікті осы жәрмеңкеге арнайы келіп, керегімді алып тұрамын. Ең алдымен мұндағы өнімнің барлығы табиғи. Бағасы да қол жетімді. Жеміс-жидектер де, картоп пен пиязды да қабымен алып, үйге қайтып барамын, - дейді қала тұрғыны Лаура Құрман.