«Ауыл аманаты» жобасының Түркістан облысында жүзеге асырылып жатқанына биыл екінші жыл. Жоба аясында ауыл халқының тұрмысы көтеріліп, ауылдық округтердің экономикасы артуда. 

Аталған жобаны жүзеге асыру аясында республикалық және облыстық бюджеттен қомақты қаржы бөлініп, 64 ауылдық округтегі мыңнан аса жоба несиелендірілген. 

Түркістан облысы ауыл шаруашылығы басқармасының басшысы Нұрбек Бадырақовтың айтуынша, Түркістан облысында 92800 агроқұрылым жұмыс істеуде. Бұл жалпы республика бойынша тіркелген агроқұрылымдардың 31 пайызын құрайды. Облыста агроқұрылымдар ұсақ шаруашылықтар негізінде қалыптасқандықтан «Ауыл аманаты» жобасы ауыл тұрғындарының табысы мен әлеуметтік жағдайының көтерілуіне ықпалын тигізуде. 

- Мемлекет басшысы Қасым-Жомарт Тоқаев Жолдауында ауыл шаруашылығы ел экономикасының жаңа қозғаушы күші болатты. «Ауыл аманаты» жобасы Түркістан аймағына соны серпін әкелді. Бұған дейін Жамбыл және Ақтөбе облыстарында іске асқан жоба былтырдан бері бізде де іске асырылуда. Жоба халықтың жұмыспен қамтылу деңгейі біршама арттырды. Бүгігі күні жоба аясында тұрғындардың орташа табысының өскенін байқауға болады. Ең бастысы, жоба кез келген ауыл тұрғынына қолжетімді, жобаларды шағын инвестициялармен жүзеге асыруға мүмкіндік беруде. Осындай жобалар арқылы біз ауыл халқының табысын арттырамыз, - деді басқарма басшысы.

«Ауыл аманаты» жобасы Түркістан облысында іске қосылған сәтте республикалық бюджеттен 11 миллиард теңге қарастырылған болатын. Халықтың 80 пайыздан астамы ауылды жерлерде тұратын Түркістан облысына қосымша 14 миллиард теңге сұралды. Сөйтіп қанатқақты жобаға бастапқыда 32 ауылдық округте тұратын мыңдаған адам үйін кепілге қойып, 2,5 пайыздық жеңілдетілген несие алды. 

Жалпы «Ауыл аманаты» жобасының мақсаты – ауыл халқының табысын арттыру, тұрғындардың әл-ауқатын жақсарту, ауыл шаруашылығы тауарларын өндірушілерді жан-жақты қолдау, аграрлық бизнесті ілгерілету мәселелерін шешуге бағытталған. Бұл жобада жеңілдіктер де жоқ емес. Мәселен, ауыл азаматтары кооператив құрамында жеңілдетілген несие ала отырып, техниканы лизингке рәсімдеуге мүмкіндік алады. Несие немесе микронесиенің мерзімі – 5 жыл болса, мал және ауыл шаруашылығы кооперативтерін құру саласындағы жобаларға 7 жылға дейін беріледі. 

- Түркістан облысының агроөнеркәсіптік кешені республикада көлемінде алғашқылардың қатарында. Климаттық жағдайы, жұмыс күші жағынан ауыл шаруашылығын жүргізу үшін қолайлы өңір болып табылады. Облыста 1 миллионнан астам тұрғынның әлеуметтік-экономикалық жағдайы ауыл шаруашылығымен тікелей байланысты. Мемлекет басшысының тапсырмасымен жүзеге асырылып жатқан «Ауыл аманаты» жобасы есебінен өңірде 30 миллиардтан аса теңгенің өнімі өндіріліп, 3413 жаңа жұмыс орны құрылып, 75 кооператив ашылды. «Ауыл аманаты» жобасы аясында облыста 3500-ға дейін жұмыс орны құрылуда. Биыл жобаға 62 ауылдық округтен 62 кооператив қатысты. Оның ішінде 2,3 миллиард теңге өсімдік шаруашылығындағы, 2,1 миллиард теңге мал шаруашылығы саласындағы жобаларға жұмсалды. Сондай-ақ, балық шаруашылығы бойынша 111 жоба қолға алынып отыр. Жалпы 6 бағыт бойынша 1200 жобаға қолдау көрсетіліп, 1701 жұмыс орны құрылды. Осы жұмыстардың нәтижесінде атаулы әлеуметтік көмек алушылар саны 340 адамға азайды, - дейді Түркістан облысы ауыл шаруашылығы басқармасының басшысы Нұрбек Бадырақов.

«Ауыл аманаты» жобасының басты мақсаты – біріншіден, ауыл тұрғындарын жұмыспен қамту, табысын молайту. Екіншіден, ауылдан жастар ірі мегаполистерге көшіп кетуде. Осы жоба аясында жастарға жағдай жасап, ауылдарды аман сақтап қалу және көші-қонды реттеу көзделген. Үшіншіден, азық-түлік қауіпсіздігін сақтау және отандық өнім үлесін көбейту. Ауылдағы тұрғындар өнімдерді өзі өндіру арқылы табысын молайтып қана қоймай, елімізді отандық өніммен қамтуға үлес қосу. 

Жалпы өткен жылы республикалық бюджеттен «Ауыл аманаты» жобасын жүзеге асыруға 19,8 миллиард теңге бөлініп, негізгі 6 бағытты қаржыландыруға басымдылық беріліп, 3256 жоба қаржыландырылған. Жобаға пилоттық түрде 64 ауылдық округі қатысты. Нәтижесінде 3413 жаңа жұмыс орындары құрылды. Атаулы әлеуметтік көмек алушылар саны 340 адамға қысқарып, орташа жалақы 20 пайызға ұлғайған.