Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында еліміздің ауыл шаруашылығы өнімдерінің көлемін және оның қосымша құнын арттыру қажеттігін, бұл – стратегиялық міндет екенін атап өтіп, саланы дамытудың негізгі бағыттарын айқындап берген болатын. 

Бұл бағытта Отырар ауданында ауыл шаруашылығы саласында атқарылған жұмыстар да аз емес.

Мәселен, Отырар ауданының әкімі Қайрат Жолдыбайдың айтуынша, ауданында өткен 10 айда жалпы өңірлік өнім көлемі 66,4 миллиард теңгені құрап, өткен жылдың тиісті кезеңімен салыстырғанда 300 миллион теңгеге артық орындалған. Оның ішінде, ауыл шаруашылығы өнімі – 33,3 миллиард теңгені құрап, тартылған инвестиция – 23,6 миллиард теңге жеткен. Сауда саласы – 2,8 миллиард теңгені, өнеркәсіп – 22 миллиард теңгені, құрылыс көлемі – 8,2 миллиард теңгені құраған. 

- Президентіміз Қасым-Жомарт Тоқаев: «Азаматтар, әсіресе, ауыл тұрғындары заңды түрде табысты жұмыс істеп, болашағының қамын өзі ойлауы керек. Оларды осыған ынталандыру – мемлекеттің басты міндетінің бірі. Былтыр «Ауыл аманаты» жобасы басталды. Жалпы нәтижесі жаман емес. Енді осы жоба аясында тағы бір жаңа тәсілді, яғни «тауар несиесін» беру мәселесін қарастыру қажет. Ауыл тұрғындарына өз өнімдерін өңдеуге және сатуға мүмкіндік беретін инфрақұрылым құру өте маңызды» деп агросалаға басымдық бергені де белгілі. Биыл Отырар ауданында 35 мың гектарға егін себіліп, егістік алқабынан 395 993 тонна өнім жиналды. Одан бөлек, ауданда 2024 жылдың ІІ тоқсанында бірнеше инвестициялық жоба іске асырылды. Мәселен, «Баржоу Хинкай Трейд гоу» ЛТД компаниясымен бірлесіп 500 гектар алқапқа тамшылатып суару әдісімен мақта дақылын егу жұмыстары жүргізіліп, 1200 тонна мақта өнімі алынды. Сонымен қатар, ауданда жыл соңына дейін 800 млн теңгеге сауда саласы бойынша екі шағын инвестициялық жобаны іске қосу жоспарланып отыр.  Бұдан бөлек, 2025 жылы құны 360 миллион теңгені құрайтын түйе сүтін өңдеп, ұнтақ шығаратын кәсіпорын құру көзделген. Сондай-ақ, 2025-2030 жылдары құны 145 миллиард 625 миллион теңгені құрайтын 157 ірі және шағын инвестициялық жобалар жүзеге асып, 1 790 адам жұмыспен қамтылмақ. Сондай-ақ, келесі жылы ауданда «Nomad» жауапкершілігі шектеулі серіктестігінің демалыс аймағы іске қосылады. Ал, 2026 жылы «Жанұя» жауапкершілігі шектеулі серіктестігінің емдік балшық пен жылы сумен емдеу орталығын іске қосу жоспарланған, - деді аудан басшысы. 

Инфрақұрылыммен қамту бойынша аудандағы 37 елді мекеннің 35-і орталықтандырылған ауыз су жүйесімен қамтылған. Қалған екі елді мекенді ауыз сумен қамту жұмыстары жүргізілуде. 2018-2023 жылдар аралығында 21 елді мекен табиғи газ жүйесіне қосылып, жалпы аудан халқының газбен қамтылу деңгейі 71,4 пайызға жеткен. 2024 жылы «Ауыл – ел бесігі» жобасы аясында 13,7 шақырымдық 7 ішкі көшеге, жергілікті бюджет қаржысы есебінен 34,8 шақырымдық 29 көшеге орта және ағымдағы жөндеу жұмыстары жүріп, қанағаттанарлық дәрежедегі жолдар үлесі 80,1 пайызды құрап отыр.

- Мемлекет басшысы Жолдауында «Бөлінген қаражаттың бәрі тиімді жұмсалуға тиіс. Алайда шындыққа жанаспайтын ақпарат беру, басқаша айтқанда, мәліметтерді бұрмалау ауыл шаруашылығындағы шынайы ахуалды бағалауға кедергі келтіріп отыр. Арнайы комиссия 2 миллион ірі қара және 3 миллионнан астам уақ мал санда бар, санатта жоқ екенін анықтады. Егін шаруашылығы саласында да осындай жайттар бар екені белгілі болды. Шын мәнінде, мұның бәрі – мемлекеттен субсидия алу үшін жасалған көзбояушылық. Ондай қылмыстық әрекеттерге тосқауыл қою қажет. Ал, мұндай іспен айналысқан адамдарды жауапкершілікке тарту керек» деп атап өткендей біз өңірде мал басы мен ауыл шаруашылығы техникаларына тиісті тексеру жүргізіліп, мал басы мен техника саны нақтыланды. Тиісті жұмыстар, техникаларды жаңарту бағытындағы жұмыстар ауданның жол картасына сәйкес атқарылуда, - дейді аудан әкімі Қайрат Жолдыбай.

 Бұдан бөлек, аудандағы Шәуілдір ауылында «Жайлы мектеп» ұлттық пилоттық жобасы аясында 600 орындық мектеп құрылысы жүргізілуде. Нысанды биыл жыл соңына дейін пайдалануға беру жоспарланған. Қазіргі таңда абаттандыру жұмыстары жүргізілуде. Сондай-ақ, «Ауылдық денсаулық сақтауды жаңғырту» ұлттық жобасы аясында Аққұм ауылынан дәрігерлік амбулатория құрылысы мен Шытты ауылынан фельдшерлік-акушерлік нысанның құрылысы жүргізіліп, пайдалануға берілді.