Түркістан қаласындағы саябақтар мен гүлзарларды күтіп ұстау және ішкі ирригациялық жүйелердің жай-күйі – басты назарда. Биыл қаланың 12,2 гектар аумағына биыл 15 мыңнан аса ағаш  егіліп,  9000 шаршы метр аумаққа көгал төселді. 200 мың түп гүл отырғызылды. 380 гектар аумақта күтіп-баптау жұмыстары жүргізілуде. Облыс орталығында 400 гектар жерге орналасқан 248 саябақтар мен гүлзар, желілік бақ пен жасыл желекті демалыс аймақтары бар. Демалыс аумақтары жарықтандырылып, көпжылдық және гүлді ағаштар егілген.

Әр саябақ заманауи, креативті әрі қайталасбас үлгіде салынған. Саттарханов көшесінің бойындағы «Желілік саябақтың» жер көлемі 20 гектардан асады. Мыңнан астам шаммен жарықтандырылған саябақ субұрқақ, орындықтар, 2 мыңнан астам кіші архитектуралық форма қойылған.

Одан бөлек, Әкімшілік іскерлік орталық аумағына «Гүлдер» саябағы мен Сейхун көшесінің аралығына гидрантты жүйемен қамту жобасы әзірленуде. Шаһардағы жалпы ирригациялық арықша көлемі - 22,5 шақырымға созылған. Қазіргі таңда аталған арықтардан секундына 100 литрге дейін су алынуда. Арыс-Түркістан каналынан бастау алатын ирригациялық арықтар қаланың орталығы мен бірнеше секторларды ағын сумен қамтиды.

Шаһардағы көгалды аумақтар гидрантты жүйемен және ирригациялық арықшалар арқылы суарылады. Гидрантты жүйемен суарылатын аумақтарда 6 кезеңдік құрылыс жұмысы жүзеге асырылған. Оның бүгінде төрт нысаны іске қосылып, екі жобаның құрылыс жұмысы әлі жалғасуда.

Айта кетейік, Мемлекет басшысы Қасым-Жомарт Тоқаевтың  тапсырмасымен елімізде қазіргі таңда «Жасыл Қазақстан» ұлттық жобасы іске асырылуда. Бұл жөнінде Президент былай деп нақты тапсырма бергенболатын. "Менің тапсырмаммен 2 миллиард түп ағаш отырғызылады. Бұл азаматтарымыздың тарапынан кең қолдау тапқан бастама болды. Жалпы, бұл мәселеге немқұрайлы қарауға болмайды. Қоршаған ортаға ешқандай оң әсері жоқ, қаражатты құр игеруді көздейтін жасанды шараларға жол бермеу қажет. Сондықтан ағаш отырғызуға лайықты орындарды анықтау үшін ғалымдармен және жұртшылықпен бірлесіп, кәсіби талдау жүргізген жөн. Қоғамдық бақылау құралы ретінде интерактивті карта дайындау қажет. Сол арқылы экология саласында атқарылып жатқан жұмыстардың барысы мен тиімділігін қадағалауға болады. Үкіметке 2021-2025 жылдарға арналған «Жасыл Қазақстан» ұлттық жобасын әзірлеуді тапсырамын. Әсіресе, қоршаған ортаны қорғау ісіне қажетті барлық көрсеткіштерді цифрландыру – маңызды міндеттердің бірі".