Президент Қасым-Жомарт Тоқаев Жол­дауы­­нда агроөнеркәсіп кешені­­нің әлеуетін толық іске асыру, ауыл­­­шаруа­­шылық өнімдерінің экспортын көбейту, мемл­екеттік қолдау шараларын зама­науи агро­т­ехнологияларды ауқымды түрде тартуға бағыттау қажеттігін атап көр­сет­кен-ді. Жалпы, ауылшаруашылық саласы Мемлекет басшысының назарынан тыс қалған емес. Осы саланы дамытуға негіз­дел­ген мәселелерді дер кезінде көтеріп, на­қты тап­сырмалар жүктеп келеді. Ал тапсыр­ма­лардың орындалуын, нақты нәти­жені өңірлерде, оның ішінде аудандарда ат­қарылған істерден де білуге болады. 

Төле би  – аграрлы аудан қатарында. Ауданда тау бөктерінде орналасқандықтан, мал және егін шаруашылығы өз деңгейінде дамыған. Аудан диқандары бірнеше жылдар бойы мақсары өнімімен Түркістан облысы бойынша алдыңғы қатардан көрініп келеді. Биылғы жыл да шаруалар үшін ырысты болғалы тұр. Шаруалар ауа-райының қолайлы болуына байланысты 10000 тоннадан астам өнім жиналады деп күтуде. Жалпы, аудан аумағына 10731,5 гектар мақсары егілді дейді салаға жауапты мамандар. 

Қазіргі кезде мақсары ору науқаны басталды. Диқандар мақсарының әр гектарынан 9-9,5 центнерден өнім алып жатыр. 

Мақсары дәні барлық кезде үлкен сұранысқа ие. Мақсары тұқымшасындағы жалпы май мөлшері 25-37%, ал ядросына 50-56% дейін ақшыл сары түсті бағалы сұйық майы болады. Өсімдік майының дәмділігі және жұғымдылығы күнбағыс майына пара-пар, ал тек қана ядросынан сығылған майдың сапасы зәйтүн майынан кем түспейді. Халықтық медицинада мақсары жапырақтары, гүлдері және майынан әр түрлі дәрі дәрмектер жасалады, сонымен қатар, өсімдік майын сыр-бояу, линолеум, сұйық сабын өндірісінде т.б. техникалық мақсаттарда пайдаланады. 

Түркістан облысына қарасты Төле би ауданының диқандары бүгінде ауыл, аудан, аймақ, облыстың егін шаруашылығы мен ел экономикасына айтарлықтай үлес қосып келеді. Ол үшін диқандар жемісті еңбектерінің нәтижесіне шүкіршілік айтуды ұмыт қалдырған емес.