Шымкенттегі Қазақстан медициналық колледжінде «Bir Tolqynda» диалог алаңы аясында жастармен кездесу өтті. «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» тақырыбына арналған жиында Мемлекет басшысы Қасым-Жомарт Тоқаевтың халыққа арнаған Жолдауында көтерілген мәселелер талқыланды.

Кездесуге «Әділет» партиясы Шымкент қалалық филиалы төрағасының орынбасары Ербол Байқонысов, жас қоғам белсендісі әрі ментор Ақан Бесбаев және «Жастар рухы» жастар қанаты қалалық филиалының төрағасы Бекзат Төлебай қатысты. Қатысушылар жастардың ел дамуына араласуы, технологиялық өзгерістерге бейімделуі және цифрлық жаңғыру жағдайындағы жаңа міндеттер жөнінде пікір алмасты.

Диалог алаңының негізгі мақсаты – жас буынның ел болашағына қатысты көзқарасын тыңдап, қоғамдағы өзекті мәселелерді ашық талқылау. Әсіресе, жасанды интеллектінің күнделікті өмірге, білім беру жүйесіне және еңбек нарығына ықпалына назар аударылды. Технологияның қарқынды дамуы жаңа мүмкіндіктермен қатар, оны сауатты әрі жауапкершілікпен пайдалану қажеттігін де алға шығарып отыр.

Бүгінде цифрлық құралдар ақпарат іздеу, білім алу және кәсіби дағдыларды жетілдіру үдерісіне елеулі өзгеріс енгізуде. Сондықтан жастар үшін жаңа технологияларды меңгерумен қатар, ақпаратты саралау, деректердің дұрыстығын тексеру және цифрлық ортада қауіпсіз әрекет ету дағдылары да маңызды. Кездесуде осы өзгерістерге бейімделу және жас ұрпақтың жаңа жағдайдағы рөлі жөнінде ой бөлісуге мүмкіндік туды.

Мемлекет басшысы айқындаған цифрландыру бағыты аясында жасанды интеллектіні дамыту мен оны түрлі салаға енгізу мәселесі өзекті болып отыр. Бұл үдерісте жастардың технологиялық сауатын арттырып, бастамаларын қолдау және қоғамдық мәселелерді шешуге қатыстыру маңызды. Өйткені цифрлық өзгерістердің нәтижесі технологияның өзіне ғана емес, оны қолданатын адамдардың білімі мен жауапкершілігіне де байланысты.

«Bir Tolqynda» диалог алаңы жастардың қоғамдық өмірге араласуына, өз пікірін ашық білдіруіне және маңызды мәселелерді талқылау тәжірибесін қалыптастыруына бағытталған. Осындай кездесулерде жас буынның ұсыныстары ортаға салынып, елдің болашағына қатысты мәселелер жөнінде пікір алмасуға жағдай жасалады.