Шымкент қаласының Еңбекші ауданында «Заң мен тәртіп» қағидаты аясында «Халық заңгері» республикалық акциясы өтті. Еңбекші ауданы прокуратурасының ұйымдастыруымен өткен іс-шара тұрғындардың құқықтық мәселелерін шешуге жәрдемдесіп, заң талаптарын түсіндіруге бағытталды.

Акцияға сот орындаушылары, заңгерлер, жергілікті атқарушы және құқық қорғау органдарының өкілдері қатысты. Мамандар тұрғындарды жеке қабылдап, олардың өтініштері мен сауалдарын тыңдады. Азаматтарға күнделікті өмірде кездесетін құқықтық мәселелер бойынша тегін кеңес беріліп, қолданыстағы заңнама талаптарына сәйкес түсіндірмелер ұсынылды.

Іс-шара барысында тұрғындар өздерін толғандырған сұрақтарын қойып, заңды мүдделерін қорғау жолдары жөнінде кеңес алды. Мамандар әр өтінішті назарға алып, азаматтарға құқықтары мен міндеттерін түсіндірді. Мұндай қабылдаулар халықтың құқықтық мәселелерін дер кезінде анықтап, оларды заң аясында шешудің жолдарын қарастыруға мүмкіндік береді.

Акция аясында 200-ге жуық азамат қабылданып, оларға тиісті құқықтық көмек көрсетілді. Тұрғындардың мамандармен тікелей тілдесуі өзекті мәселелер бойынша нақты жауап алуға, заңнама талаптарын дұрыс түсінуге және құқықтарын қорғаудың тиімді тетіктерін білуге жағдай жасады.

«Халық заңгері» акциясының маңызы – азаматтардың білікті заң көмегіне қолжетімділігін арттырумен қатар, құқықтық сауаттылықты қалыптастыру. Өз құқығы мен міндетін білетін адам даулы жағдайларда заңды жолды таңдап, мәселесін құқықтық тәртіппен шешуге ұмтылады.

«Заң мен тәртіп» қағидаты аясында ұйымдастырылған мұндай шаралар тұрғындар мен мемлекеттік органдар арасындағы байланысты нығайтуға да ықпал етеді. Халықтың өтініштерін тыңдап, құқықтық мәселелерге түсінікті жауап беру – қоғамда заңға деген құрметті арттырудың маңызды бөлігі. Ал азаматтардың құқықтары мен заңды мүдделерінің қорғалуы әділетті қоғам қалыптастырудың негізгі шарттарының бірі саналады.