Түркістан облысының бұрынғы әкімі Өмірзақ Шөкеевтің кезінде салынған құны 9 миллиард теңгелік жағажайы қирап жатыр. Осы жағажайдың қазіргі ахуалы туралы түсірілген бейнежазбаны EGOV.PRESS порталы жариялады.

Бейнежазбаға қарағанда, қазынаның миллиардттарына салынған нысан бүгінде қаңырап қалған.  Айналадағы нысандардың бәрі қараусыз жатыр, бүлінген, талқандалған.

– Дубайды жолда қалдырады,- дейді жағажайдың қазіргі қалпын келеке еткен азамат.

Бюджеттің миллиондарына егілген ағаш көшеттері қурап кеткен. Жуыну бөлмесі, дәретхананың есік-терезелері сынған, ашық-шашық. Салқын сусындар сататын дүңгіршек, ойын алаңшалары да қаңырап тұр. Ал көлдегі су таза емес, лай.

Аталған жағажай 2022 жылдың шілдесінде пайдалануға берілген болатын.  Сол кезде Түркістан облыстық әкімдігі:

– Туристік-реакциялық орталық туризмді дамытуға ғана емес, Түркістан аумағын көгалдандыруға және климаттық жағдайларды жақсартуға да ықпал етеді. Жағажай құрылысы 2020 жылдың қарашасында басталды. Жалпы ауданы - 81 гектар, ал су сыйымдылығы - шамамен 2,5 миллион текше метр. Көктемгі суды қабылдайтын және оны өткізетін арналар да дайын. Жағажайда емдік қасиеттері бар құм төселіп, ағаштар отырғызылған. Жаңа туристік нысанға апаратын жолдың сапасы жоғары деңгейде. Жақын арада балалар демалыс аймағын, элиталық коттедждер, қонақүйлер, аквапарк салу жоспарланып отыр, - деген мәлімет таратқан болатын.

Шөкеев отставкіге кеткен соң жағажайдың тіршілігі тоқтады. Жоспарлардың бәрі аяқсыз қалды. 2023 жылдың күзінде елордада өткен брифингте осы нысанға қатысты сауал сол кездегі облыс әкімі Дархан Сатыбалдыға қойылған болатын.

– Соңына дейін бітпеген нысан. Оның негізгі екі функциясы бар. Біріншісі, көктемде су тасқыны кезінде жоғарыдан Қаратаудың етегінен келген суды ұстап қалу. Ол болмаса су ары қарай Түркістанға кетіп қалады. Су қоймасының көлемі 2,5 млн текше метрді құрайды. Екінші функциясы – сол суды жаздыгүні тазалап, ары қарай жергілікті тұрғындарға шомылатын орын ұйымдастыру. Басына барған кезде шешім қабылдадым: қаржы тапшы болғаннан кейін оны жалғастырудан бас тарттым. Кемшіліктерді көріп, мердігерге біз кемшіліктерді жою бойынша ескерту бердік. Егер олар бермесе, ертеңгі күні сотқа береміз. Ол – мемлекетті сараптамадан өткен жоба. Ол жоба бойынша тексеру жұмыстарын жүргіземіз. Оны тиісті құзырлы органдарға жібереміз, – деген еді.

Алайда тексеру жұмыстарының қорытындысы осы уақытқа дейін белгісіз. 

Айтпақшы, түркістандық қоғам белсендісі Сәкен Ханділлаевтың былтыр тамызда әлеуметтік желіде жариялаған видеосына қарағанда, өткен жылы Шаға жағажайына су толтырылмаған. Яғни, туристерді тартады деген нысан мүлдем жұмыс істемеген деген сөз. Жағажайдың ендігі тағдырын кім шешеді? Түркістан облыстық әкімдігі ме әлде Түркістан қаласының әкімдігі ме?

Жалпы, Түркістан облысында Шөкеевтің кезінде қолға алынып, бірақ аяқсыз қалған жобаларды қазір іздеп жатқан да ешкім жоқ сияқты. 

2021 жылдың басында Шөкеев Түркістанда өзбекстандық  Artel компаниясы 1 млн-ға дейін газ плитасын шығаратын зауыт салатынын мәлім еткен болатын. Мұндай мәлімдемені облыс басшысы Өзбекстанға жасаған іссапарынан кейін айтқан болатын. Жоспар бойынша көрші ағайындар Түркістанның индустриалды аймағында газ плиталары мен су жылытқыш құрылғыларын өндіретін кәсіпорынды екі кезең бойынша салуы тиіс еді. Жалпы 36 млрд. теңгені құрайтын жоба іске асқан соң жергілікті 2200 адам жұмыспен қамтылады деген ақпарат айтылған. Алайда Түркістанда шығарылды деген газ плиталары мен электрлі су жылытқыш құралдарын көрген адам бар ма өзі? 

2022 жылы басталады деген Түркістан мен Ташкентті жалғайтын жоғары жылдамдықты темір жол магистралы туралы да хабар жоқ.  

Осындай мегажобалардың жүзеге аспай қалуы Шөкеевтің қателігі ме әлде басталған істі ары қарай жалғап кете алмаған кейінгі әкімдердің қиянаты ма? Сіз қалай ойлайсыз?