Қызылша – кең таралған жедел инфекциялық ауру, көбінесе балалар ауырады, дене қызуының 38—40°C дейін көтерілуі, мұрын, көз, тамақ қабыну, теріде бөртпе пайда болу белгілерімен сипатталады. Қызылша бүгінгі күнде ең жұқпалы аурулардың бірі. Егер бұрын қызылшамен ауырмаған және егілмеген адам қызылшамен ауырған адаммен қарым-қатынаста болса, ауру жұқтыру қаупі өте жоғары. Сол үшін де екпе мерзімінде екпені уақытылы алу және инфекция ошағында эпидемияға қарсы шаралар жүргізу өте маңызды.

Қызылшаның белгілері: 

- тамағындағы қабыну; 

- көздің қызаруы; 

- ұртта Бельский-Филатов-Коплик ақшыл бөртпелердің пайда болуы; 

- теріде үш күнде біртіндеп шыққан бөртпелер диагнозды толық дәлелдейді.

Есіңізде болсын, ауру бөртпе пайда болып басталмайды, суық тию белгілері сияқты басталады - дене қызуы 38-40 градусқа көтерілу, әлсіздік, тәбет тартпау, құрғақ жөтел, мұрыннан су ағу.

Соңынан коньюктивит-көзі қызарып қабыну пайда болады. Алғашқы белгілері байқалғаннан соң, шамамен 2-4 күннен кейін ауыз қуысында ұсақ ақшылдау бөртпелер пайда болады. 

3-5 күні бөртпелер айқын дақ түрінде қаптап, көбейіп кетеді. Құлақтың  түбінен, маңдайдан бастап, ары қарай бүкіл денесіне тарайды. 

Бөртпе 4-7 күн тұрады. Олар жоғалған соң, орнында қоңырлау дақтар қалады, екі аптадан соң тері тазарады.

Берілу жолы - ауа-тамшы арқылы. Вирус сөйлескенде, жөтелгенде, түшкіргенде ауру адамның сілекейінен сыртқы ортаға түседі.

Асқынуы:

- Өкпенің қабыну ауруларына;

- Көздің мөлдір қабығының зақымдалуына;

- Миокардит;

- Гепатит;

- Гломерулонефрит;

- Ең ауыр асқыну - орталық жүйке жүйесінің зақымдануы (энцефалит, менингоэнцефалит).