17 қараша күні Нахимов сайлау округі бойынша Жарқайың ауданының Нахимов ауылдық округінің әкімін сайлау өтті. Аудандық аумақтық сайлау комиссиясының төрағасы Жанар Рамазанованың айтуынша, Жарқайың ауданы Нахимов ауылдық округінің әкіміне 27 қазанда ұсынылған 3 кандидат тіркелген. Кандидаттардың бірі Amanat партиясынан ұсынылса, екеуі өзін-өзі ұсынғандар.

- Бүгінгі күні аудандық маңызы бар қала, ауыл, кент, ауылдық округ әкіміне кандидат саяси партия және өзін-өзі ұсыну тәсілімен ұсынылады. Алдымен олар дауыс беруге құқығы бар тиісті сайлау округі сайлаушыларының жалпы санының кемінде бір пайыз дауысының қолдауына ие болуы тиіс. Сайлаушыларды қолдау олардың қолдарын жинаумен куәландырылады. Кандидат тіркелу үшін саяси партия мен өзін-өзі ұсынған кезде азаматтың кандидат болуға келісімі, өмірбаяндық деректері, кандидат пен жұбайының активтері мен міндеттемелері туралы декларацияны тапсырғаны туралы мемлекеттік кіріс органынан анықтамасы, Қазақстан Республикасы мемлекеттік қызметіне кіретін азаматты арнайы тексеру үшін қажетті құжаттарды, сайлау жарнасын енгізгендігін куәландыратын құжат, кандидаттың саяси партияға мүшелігін растайтын құжат ұсынуы қажет. Міне, жоғарыда біз ауылдық округ әкіміне үміткер ретінде тіркелетін кандидаттарға қойылатын талаптар туралы қысқаша айттық. Сол талаптарды орындаған Нахимов ауылдық округі әкімі лауазымына 3 кандидат тіркеліп отыр. Оның біреуі Amanat партиясы тарапынан ұсынылса, 2-уі өзін-өзі ұсынғандар. 

Саяси партия тарапынан ұсынылған кандидат, округтің әкімі, 52 жастағы Жүсіпова Жанна Сабыржанқызы. Өзін-өзі ұсынғандардың бірі - Сайдалина Айгүл Темірханқызы. 44 жастағы ол Державин қаласы әкімі аппаратының бас маман. Екіншісі – Тәкенова Жұлдызым Сабырбекқызы. 42 жастағы ол «Жарқайың ауданы әкімінің аппараты» мемлекеттік мекемесінің ұйымдастыру-бақылау бөлімінің басшысы, - дейді комиссия төрағасы. 

Сонымен «Қазақстан Республикасындағы сайлау туралы» Қазақстан Республикасы Конституциялық заңы 14-бабының 9) тармақшасына, 44-бабының 2-тармағына, 45-бабына, 113-10-бабына сәйкес, Жарқайың ауданының Нахимов ауылдық округінің әкімі сайлауының қорытындысы туралы учаскелік сайлау комиссияларының хаттамасы негізінде Жарқайың аудандық аумақтық сайлау комиссиясы сайлау қорытындыларын жариялады. Атап айтсақ, Нахимов ауылдық округі бойынша сайлаушылар тізіміне енгізілген 185 азаматтың 142-і өз таңдауын жасап, дауыс берген. Дауыс санау барысында 10 сайлаушы барлығына қарсы дауыс бергені анықталды. Ал сайлау барысында Жүсіпова Жанна Сабыржанқызы сайлаушылардың 99 дауысын жинаса, Сайдалина Айгүл Темірханқызы сайлаушылардың 17, ал Тәкенова Жұлдызым Сабырбекқызы 15 дауыс иеленген.

Сөйтіп Нахимов ауылдық округінің әкімі болып округті бұған дейін басқарып келген, 52 жастағы Жүсіпова Жанна Сабыржанқызы сайланып, өз орнын сақтап қалды. 

- Бүгінгі күні Нахимов ауылдық округ әкімі сайлауында өз орнын сақтап қалған Жанна Сабыржанқызы аудан активінде өзінің сайлауалды бағдарламаласында айтылған, «Ауыл аманаты» жобасын орындау, ағын су мәселесін шешу, су үнемдеу технологиясын тиімді пайдалану мен ауыл шаруашылығы техникасын жаңарту, мемлекеттік бағдарламаларды орындау ісіне айрықша көңіл бөлуге уәде етті. Сонымен қатар, жұмыспен қамтуды үйлестіру, шағын және орта бизнесті қолдау, кәсіпкерлік субъектілерін қаржылай қолдау және жаңа бизнес идеяларды іске асыру, ауылдың мүмкіндігін ескере отырып туризмді дамыту мәселесіне назар аударатындығын жеткізді. Бүгінгі таңда ол өзінің сайлауалды бағдарламасында айтылған міндеттерді орындауға кірісіп кетті, - дейді аудандық аумақтық сайлау комиссиясының төрағасы Жанар Рамазанова.