Экс-президент Нұрсұлтан Назарбаев шетелде емес, Астанада тұрады және оның денсаулығы жақсы. Сол баяғыша әзілдейді, биліктің реформаларын қолдайды. 

15 наурызда өткен жалпыхалықтық референдум тұңғыш президент елордадағы учаскелердің біріне келіп, өз таңдауын жасады. Дауыс беріп болғаннан кейін Назарбаев әдеттегідей қазіргі мемлекет басшысы Қасым-Жомарт Тоқаевтың жүргізіп жатқан саясатына жоғары баға беріп, оны қолдайтынын мәлімдеді.

Бұл мақтау сөздердің астарында не жатқанын түсіну үшін Назарбаевтың соңғы жылдардағы риторикасына тереңірек үңілу қажет. Сарапшылардың пікірінше, Назарбаевтың Тоқаевты ұдайы қолдауы — жай ғана ризашылық емес, бұл қазіргі саяси жағдайға бейімделудің амалы. «Қаңтар оқиғасынан» кейін елдегі билік жүйесі түбегейлі өзгерді. Ескі саяси элитаның ықпалы әлсіреп, Назарбаевтың жақын айналасындағы көптеген тұлғалар қызметінен кетіп, тіпті жауапқа тартылып жатқан тұста, экс-президент үшін Тоқаев жалғыз сенімді тірекке айналды. Шын мәнінде, бүгінгі таңда Назарбаевтың Тоқаевтан басқа сүйенер ешкімі қалмағандай көрінеді. Оның қазіргі Президентті мақтауы — өзінің қауіпсіздігі мен тарихи мұрасының сақталуының басты кепілі.

Саясаттанушылар бұл жағдайды «саяси мәжбүрлі лоялдық» деп сипаттайды. Назарбаев Тоқаевты қолдау арқылы қоғамға «мен қазіргі бағытқа қарсы емеспін, біз бір толқындамыз» дегісі келеді. Сонымен қатар, ол Тоқаевтың реформаларын қолдай отырып, 2019 жылғы билік транзиті кезінде жасаған таңдауының дұрыс болғанын дәлелдегісі келеді. Егер ол қазіргі басшыны сынай бастаса, бұл оның өзі жасаған транзит жоспарының сәтсіздігін мойындаумен тең болар еді. Сондықтан, Назарбаевтың мақтаулары — бұл тек марапат емес, бұл оның қазіргі билік жүйесімен жасасқан үнсіз келісімінің көрінісі. 

Бір сөзбен айтқанда экс-президенттің референдумға қатысып, Тоқаевты қолдауы елдегі билік балансының толықтай екінші Президенттің қолына өткенін және Назарбаевтың осы  ақиқатты  мойындағанын аңғартады.