Шымкент көшелерінде соңғы күндері полиция патрульдерінің күрт көбеюі тұрғындар арасында түрлі болжам тудырды. Әлеуметтік желілерде тараған жазбаларда қалада полиция экипаждары жиілеп, тіпті көлік базарларында жүргізушілер қажетті құрал-жабдықтарды жаппай сатып алып жатқаны айтылған.

Алайда бұл жағдайдың нақты себебі белгілі болды. Қалалық полиция департаментінің мәліметінше, 19–26 сәуір аралығында Шымкентте «Қауіпсіз жол» жедел-профилактикалық іс-шарасы өтіп жатыр. Осыған байланысты қалаға Қарағанды, Қызылорда және Жамбыл облыстарынан қосымша полиция күштері тартылған.

Ведомство өкілдерінің айтуынша, шараның мақсаты – жол-көлік оқиғаларының алдын алу және құқық бұзушылық деңгейін төмендету. Мұндай тәжірибе елімізде бұрыннан қолданылып келеді және патрульдеу тиімділігін арттыруға мүмкіндік береді.

Ресми дерекке сәйкес, іс-шараның алғашқы күнінде-ақ 1561 жол ережесін бұзу фактісі тіркелген. Оның ішінде 117 жүргізуші рөлде отырып телефон қолданған, 18 адам жүргізуші куәлігінсіз көлік басқарған, ал 3 дерек мас күйінде көлік жүргізу бойынша анықталған.

Сонымен қатар рейд барысында 72 автокөлік айып тұрағына қойылып, құқық бұзған жүргізушілерге қатысты әкімшілік шаралар қабылданған.