Әлеуметтік желіде сотталған экс-министр Қуандық Бишімбаевтың әкесі Уәлихан Бишімбаев Таразда Bishimbayev University деген атаумен жеке жоғары оқу орнын ашатыны туралы ақпарат тарады, деп хабарлайды Oinet.kz тілшісі. 

Бұл ақпаратқа Ғылым және жоғары білім министрлігі жауап берді.

Министрлік мәліметінше, Білім туралы заңға сәйкес жоғары және жоғары оқу орнынан кейінгі білім беру саласындағы кез келген білім беру қызметі міндетті түрде лицензияланады. Бұл құзырет министрлікте.

"Айтылғандарды негізге ала отырып, министрлік Bishimbayev University атауымен білім беру қызметін жүзеге асыруға лицензия берілгенін жоққа шығарады, сондай-ақ, "е-лицензиялау" ақпараттық жүйесінде тиісті өтінім болмағанын хабарлайды", - деп жазылған хабарламада.

Ал nege.kz сайтының тілшісі әңгіменің шеті қайдан шыққанын Уәлихан Бишімбаевтың өзінен сұраған екен. 

«Мұндай нәрсе біздің ойымызда да жоқ. Сыртымыздан біреулер әдейі осындай жалған ақпарат таратып жатыр. Қазір ойына келгенді айтып, жаза береді. Біздің дұшпандарымыз көп қой. Бұрынғы келін бар, қайтыс болған келіннің туыстары бар, әр нәрсені айтып жүреді.

Бізге тыныштық бермейтін болды. «Табалдырықтан биік тау жоқ, ағайыннан асқан жау жоқ» деген осы. Алдында 1 млн долларымызды алып, қайтармай қойған, бүгінде тергеу изоляторында жатқан туысымыз Қайрат Кемеловтің әйелі Тараз қаласынан. Бәлкім, солар шығаруы мүмкін.

Әрбірден соң заң саласына қатысты оқу орын ашатындай заңгер емеспін. Бұл ақпараттың жалған екендігі туралы Ғылым және жоғары білім министрлігі де мәлімдемесін таратты», – деп жауап берген үлкен Бишімбаев.

Сондай-ақ, бүгін Қуандық Бишімбаевтың бұрынғы әйелі Назым Қаһарман Бишімбаевтың балаларға алимент төлеуден бас тартқаны туралы айтыпты. Бұл туралы Уәлихан Бишімбаев:

«Алиментті заң бойынша балалардың әкесі төлейді. Ол енді түрмеде. Біз заң бойынша немерелерімнің ата-әжесіміз. Бірақ біз соған қарамастан балалардың оқуына, керек-жарағына қаржы беріп тұрмыз. Бұрын Қуандық жыл сайын шетелге демалысқа жіберіп тұрды. Қазір ондай мүмкіндігіміз жоқ. Екі зейнеткер не істей аламыз?», – дейді.

Ал Қ.Бишімбаевтың адвокаты Ерлан Ғазымжанов:

«Бұл шындыққа жанаспайды. Назым Қаһарман жалған ақпарат айтқан. Қыркүйекте шығындары туралы есеп жібергені есімде. Бишімбаев бостандықта емес қой. Әкесі ретінде алиментті өзі төлеуі тиіс. Ал ата-анасы немерелеріне көмек ретінде қаржы беріп тұратын шығар», – деді.