Жазушының екі өмірі бар дейді.  Біріншісі өз өмірі,  екіншісі   өмірден өткеннен  кейінгі,  артында қалған мұрасымен жасайтын  өмірі ғой.  Қазақ әдебиетінде өзіндік қолтаңбасын қалдырған, өзіндік мектебін қалыптастырған Мархабат Байғұттың екінші,  мәңгілік ғұмыры басталып кетті. 

Махаң көзі тірісінде айналасына шуағын шашып жүретін жан еді.  Бүгінде еске алғанда көңіл түкпірінде сол күлімсіреген кейіпте елестейді.  Енді оқырман күншуақты,  жылулықты оның шығармаларынан табады. 

Кеше Түркістанда жазушының 80 жылдық мерейтойына арнап «Мақамы бөлек Мархабат Байғұт»  халықаралық симпозиумы өтті. Қазақстан,  Өзбекстан, Қырғызстан, Еуразия жазушылар одағының мүшелері, ғалымдар, Парламент депутаттары, жалпы зиялы қауым қатысқан жиында М.Байғұттың жазушылық мұрасына талдау жасалды, естеліктер айтылды, баяндамалар оқылды. Жер-жерден келген құттықтаулар оқылды.  Жазушы Нұрғали Ораздың Махаңның өміріне арналған пьесасынан үзінді қойылды. М.Байғұт шығармаларына арналған байқаулардың жеңімпаздары марапатталды.

«Медиакратия» қоғамдық бірлестігінің, оның төрағасы, Түркістан облыстық мәслихатының депутаты Ғалымжан Елшібайдың ұйытқы болуымен өткен шарада бірқатар ұсыныстар да айтылды. Соның бірі-- М.Байғұт атындағы әдебиет үйі ашылса деген тілек.  

Кешкісін қонақтар Шымкенттегі Шанин театрында М.Байғұттың «Жоғалған жұрнақ» қойылымын тамашалады.

Жазушының 80 жылдығы бүгін Шымкентте, ертең туған жері Түлкібас ауданында жалғасады.