Қостанай облыстық орман шаруашылығы және жануарлар дүниесі аумақтық инспекциясы рейд шараларын жүргізуде. Осы себептен барлық өзен-көлдерде балық аулауға уақытша тыйым салынды, деп хабарлайды OINET.KZ сайтының тілшісі inform.kz сайтына сілтеме жасап.

Облыстық орман шаруашылығы және жануарлар дүниесі аумақтық инспекциясының балық шаруашылығы бөлімі басшысы Таңат Смайыловтың айтуынша, бұл шара өңірдегі балық қорларын толықтыру үшін жасалып отыр. 

«Облыста 20 қазаннан бастап, қараша айының соңына дейін саны аз балықтарды аулауға тыйым салынады. Мәселен, ақсақа (сиг) тұқымды балықтар сирек кездеседі және облыстың әр ауданында тіршілік етеді. Сонымен қатар кәсіпшілік мақсатта да қармақ салуға болмайды. Ал Қаратомар су қоймасы және Халвай ауылынан Аят шахтасының бөгетіне дейінгі аралықтарда балық аулау құралдарын пайдалануға жыл соңына дейін рұқсат етілмейді. Тұрғындарға осыны ескертеміз. Бүгінге дейін 200-ге жуық заң бұзушылық анықталып, браконьерлерге айыппұл салынды», - дейді Таңат Смайылов.

Қазіргі таңда облыста 805 су айдыны бар. Олардың 221-і балық шаруашылығына негізделген. Аталмыш өзендердің барлығында балық түрлерін көбейту мақсатында жұмыстар басталды.