Мәжіліс депутаты Мұрат Әбенов  халықтың несиелік жүктемесін азайту үшін банктердің шот бұғаттау тәжірибесін қайта қарауды ұсынады. Депутат банктердің шот бұғаттауы – азаматтарды қарызға батырған жүйенің көрінісі екенін атап өтті.

Әбенов банктердің тұтынушылық несиелерді кез келген адамға беруі мен бөліп төлеуді қоса есептеу халықтың қарыз жүктемесін күшейтетінін тілге тиек етті. Сонымен қатар, әлеуметтік тұрғыдан осал топтар – зейнеткерлер мен алимент алушылар да шоттарының бұғатталуынан зардап шегуде.

Депутат тәжірибені мүлде тоқтату немесе тек шоттағы қаражаттың 30%-ына ғана бұғат қоюға рұқсат беру керегін айтты. Сондай-ақ, алаяқтық жолмен рәсімделген несиелер үшін жауапкершілікті банкке артуды ұсынды.

Әбеновтің пікірінше, ережелер өзгермейінше халықтың несиелік жүктемесі мен әлеуметтік мәселелер күшейе береді.