Өнер адамдарының өз жұмысына есеп беріп отыратыны бар. Мұндай дәстүр мәдениет саласында да қалыптасқан, бір жүйеге түскен. Жыл аяғы жақындап келеді, алдағы жылдың жоспары бүгіннен жасалатыны белгілі. 

Міне аудандық мәдениет сарайында «Отырар әдебиеті және өнері» қоғамдық бірлестігінің кезекті жиыны өтті. Келелі жиында аудандағы шығармашыл жастардың басын қосқан ұйымның жыл басынан бері қолға алып, іске асырған жұмыстары сараланып, талқыланды.  

Іс-шара барысында бірлестік төрағасы Сағындық Қыдыр биыл аудан әкімдігінің қолдауымен балалар жылы аясында «Өмірдің бір қызығы бала деген» атты жазба ақындар айтысы ұйымдастырылып, ақындардың өлеңдері аудандық «Отырар алқабы» газетінде жарияланғанын, сондай-ақ, ұлағатты ұстаз, ақын Жұмакүл Нәлібаеваның 60 жасқа толуына орай «Жүйріктердің жұлдызын жаққан ұстаз» атты шығармашылық кеші жоғары деңгейде өткенін айтып өтті. «Осындай ауқымды іс-шараларды өткізуге жағдай жасап, ерекше көңіл бөлген аудан әкімі Сәкен Сұлтанхановқа және оның орынбасарлары мен атсалысқан барлық азаматтарға шынайы алғысымды білдіремін», деді бірлестік төрағасы.

Кездесуде аудан әкімінің орынбасары Айдос Құлмаханов сөз алып, киелі ауданымызда ақындар мектебінің қалыптасып, әдебиетке, өнерге құштар жастарымыздың қатары артып келе жатқанын айтты. Өнерді бағалайтын ел барда, оны биікке жетелейтін өнер иелері барда әкімдік бірлестіктің жұмыстарына әрдайым қолдау көрсете беретінін жеткізді. 

Аудан әкімінің орынбасары бірлестік мүшелеріне арнайы дайындалған төсбелгі мен куәліктерді табыстап, шығармашалық жұмыстарына толғай табыстар тіледі.

- Биыл бірлестік мүшелері де біраз жетістіктерге қол жеткізген еді. Атап айтсақ, республикалық жас ақындар айтысында топ жарған Даниял Болысбек «Күміс Домбыра» иегері атанса, оның ұстазы Дәурен Ақсақалов Жамбыл облысы, Меркі төрінде өткен мемлекет және қоғам қайраткері Асанбай Асқаровтың 100 жылдығына арналған республикалық айтыста 1 орынды жеңіп алды. Сондай-ақ, Төлеби ауданның 90 жылдық мерейтойына орай өткен «Төлебидің ғажайып өрнектері» атты облыстық өнер фестивалінде де жерлестеріміз өздерінің мықты екендерін дәлелдеп, ауданымыздың абыройын асқақтатқан еді. Осы фестивальде қылқалам жанры бойынша Рена Табылхан І орын, жазба ақындар мүшәйрасында Дәурен Полатбаев ІІІ орын, айтыс жанры бойынша Ахметрасул Баянбай бас жүлдені иеленіп мерейімізді үстем етті, - деді бірлестік жетекшісі. 

Салтанатты жиында өлкетанушы, этнолог, әдебиеттанушы Абдулла Жұмашов қазақ даласына белгілі ақын, сатирик Асқар Тоқмағамбетов алғаш негізін қалаған «Отырар әдебиеті және өнері» бірлестігінің жұмысы қайта жанданып жатқанына ризашылығын білдірді.

Іс-шарада ақын Дәурен Ақсақалов домбырасын қолына алып «Бірлестігім өзіңді сағындық қой» деп бастаған арнау өлеңін «Жақсылықта қосылсын бастарымыз» деген шумақтармен түйіндесе, бірнеше байқаулардың жеңімпаздары Мұхтар Асанов пен Асқар Сапарбаев Кенен Әзірбаевтың «Ақыл-нақыл», Шылбы Көмекұлының «Жігітке ақыл айтсам елемес пе?» атты термелерін нақышына келтіре орындады. 

Кеш соңы аудандық мәдениет сарайы әншілерінің орындауындағы ақын Жұмакүл Нәлібаева мен сазгер Сағынтай Құттыбайдың әніне жазылған «Өнер құсы» атты әуезді әнмен қорытындыланды.