Экстрим, адреналинді сүйесіз бе, онда дереу Қытайға аттаныңыз. Себебі мұнда биіктен қорықпаймын дейтін адамның өзін қалтыратып жіберетін көпір бар. Хунань провинциясында жерден 180 метр биіктікте орналасқан көпір бастан-аяқ шыныдан тұрғызылған. Ол әлемдегі шыныдан жасалған ең ұзын көпір болып саналады. Бойыңыздағы үрейді жеңгіңіз келсе тау аңғарлары айнадай болып көрініп тұрса да тұп-тура 300 метрді жүріп өтуіңіз керек. 

Әрине, оны құрастырған қытайлар ақымақ емес. Көпірдің барлық қауіпсіздік ережелері сақталған. Көпірдің  шынысы  кәдімгі шынылардан 25 есе қалыңдатылған және 8 баллдық жер сілкінісіне төтеп бере алады. Сондықтан көпір шытынап, сынып кетеді деп қорықпаңыз. Бір қызығы көпірдің үстінен айналадағы табиғаттың көрінісі көзге ерекше ұрады.