Сізді өміріңізде бір рет болсын ара шағып көріп пе еді? Сол сәттегі күйіңізді еске түсіргіңіз келмейтін болар. Айтқымыз келгені, ара шақса қуаныңыз. Себебі, оның шаққаны да шипа.
Араны шақтыру арқылы емдеу медицинада апитерапия деп аталады. Ең алғашқы апитерапиялық клиника Мәскеуде Михаил Миронович Френкельдің бастауымен ашылды. Ал елімізде кейінгі жылдары ғана қолға алына бастады. Мамандардың айтуынша араның уымен емделу арқылы көптеген ауру түрлерінен айығуға болады.
Араның бізгегі негізінен жүйке жүйесі, жүрек қан-тамырлары аурулары кезінде қолданылады. Бірақ бұл емді асқынбай тұрып алу керек. Сондай-ақ инсульт алған адамдар, препараттар көмектеспеген жандар осы емге жүгінеді. Араның улы болатынын әрқашан есте ұстау керек. Процедура кезінде қолайсыздықтар тумас үшін адамдар медициналық тексеруден өтіп келуі керек. Әсіресе қан көрсеткішіне назар аударылады. Алғашында 5 секунттай ғана шақтырып аллергиясы бар жоғы бақыланады.
Ал арамен емдеу курсы оның санына тәуелді. Ең азы 30 арадан бастап, 70, 150 араға дейін шақтырып дертке шипа табуға болады. Тек ескеретін жәйт бір күнде 12 арадан артық шақтыруға болмайды. Мөлшері тым көп болса уланып қалу қаупі бар. Сол себепті де тікелей маманның бақылауымен жүзеге асады.
Араның бізгегін алып қарасақ тармақтың басында оның уына толы қалташа бар. Бұл қалташаның іші 30 минутта босайды, яғни ара шаққаннан кейін тінді адам денесінде қалташа бос қалғанша 30 минут ұстауға болады деген сөз.
Бұл жәндіктің арқасында емделіп жүрсеңіз мамандар тарапынан ұсынылатын мына кеңестерді естен шығармаңыз:
уақытымен тамақтану;
ем-шараға ашқарында келуге болмайды;
аллергиялық реакциялар тудыратын тағамдардан бас тарту керек;
цитрусты жемістер, шоколод, қою шәй мен кофе, ішімдік ішуге тыйым салынады;
бал жеуге рұқсат.
Жалпы бұл жәндіктің өте еңбекқор екенін білеміз. 100 гр бал жинау үшін бір ара 46 мың км ұша алады. Осындай жедел жұмысқа үйренген олар өз өмірлерін 5-6 рет ұзартуға қабілетті. Адамның да ұзақ жасауына ықпалы бар екенін байқадыңыз. Ендеше ара шағып алса шошымаңыз, тек шипалы болсын деңіз!
Дайындаған: Амангүл Ермекқызы
Дереккөз : anabol.kz
